Alarma pa cas di Minister y placa di huur cu no ta bay pa museo 

Durante e debate publico riba presupuesto 2015 nos a cuestiona na man di dos documento e mentalidad cu cual Gabinete Eman ta goberna nos Pais. E gobierno aki ta abusa di e confiansa y di e fondo publico di e Pueblo di Aruba. E abuso di e gobierno aki mester wordo exponi, investiga y condena

Alarma pa cas di minister
Nos a expone un documento di ministerraad den cual tur e ministernan di Gabinete Eman riba peticion di Minister Otmar Oduber ta bay di acuerdo pa paga pa instalacion di alarma pa cas di e minister. Esaki ta un abuso, ya cu pa ley e tipo di gastonan aki no por wordo cubri pa ministernan di nos Pais. E no ta bay pa e suma di placa y tampoco pa si na fin di dia e gastonan aki no a wordo cubri pa e minister. E ta bay pa e hecho cu Minister Oduber y e demas ministernan di Gabinete Eman ta purba abusa cu e fondonan publico limita di nos Pais. Bo no por compara esaki cu e cuido policial cu un mandatario local of internacional por haya ora ta teme pa su seguridad, ya cu pa esey tin fondonan cu ta wordo aloca pa Cuerpo Policial y tambe pa Seguridad Nacional. Pero e gastonan di seguridad di e vivienda priva di un mandatario ta core pa su propio gasto. Pesey e solo hecho cu ta haci e peticion pa cubri e gastonan priva aki ta mustra e mentalidad di abuso di fondo publico di e gobierno aki.

Huur cu no ta bay pa museo
Minister de Meza ta pidi 34.800 florin pa huur di museo na Sanicolas, siendo cu e Minister encarga cu museo ta Minister Oduber y siendo cu ta Minister Sevinger ta esun cu ta firma pa huur edificio. Ora nos a cuestiona e hecho cu gobierno ta paga solamente 1 florin na huur y minister ta pidi 34.800 florin, tur tres minister a laba man y ningun por splica na unda e resto di e 34.800 florin ta bay. Nos a compronde cu den e edificio pa cual ta pidi e 34.800 florin aki, un banda musical ta train y cu pafor hasta tin un carwash. Esaki sigur ta un abuso cu fondonan publico cu ningun di e ministernan aki y tampoco Minister Bermudez por hustifica.

Mester investiga y condena
Esaki ta apenas dos caso concreto den cual e abuso di fondo publico ta keda exponi. Esaki ta tipifica e mentalidad cu cual Gabinete Eman ta goberna. Pesey Banco Central, CFT y IMF ta bisa nos cu menos di 1% di tur e fondo publico maneha pa e gobierno aki a bay den inversion pa Pueblo. Awor Pueblo por mira unda su placa ta bay. E gobierno aki mester wordo investiga y condena pa tur e abusonan aki. Pasobra cu e mentalidad aki, Pueblo por ta sigur cu tin hopi mas di e casonan aki di abuso di fondo publico.

18 mei 2015

Expresionnan haci den e articulo aki no necesariamente ta refleha opinion di ArenaPoliti.co