Parlamento diaranson ultimo a pasa e cambio di ley di moneda, den cual ta cambia e cara di e moneda di Reina Beatrix pa cara di Rey Willem Alexander. "Naturalmente nos ta sostene e ley, na prome lugar pasobra e ta refleha e respet y aprecio cu na Aruba tin pa cas real. Un respet cu ultimo tempo a wordo poni na prueba, ora cu integrantenan di gobierno di Mike Eman a fulmina contra Gobernador, contra gobierno di Reino, pero mas aun ora a cuestiona e autoridad di Rey Willem Alexander pa firma e KB. Respet nos no mester mustra solamente cu e cambio di moneda, respet nos mester mustra den nos actonan y den nos palabranan. Nos a hasi un sondeo den cual a resulta cu e gran mayoria di nos pueblo ta di acuerdo cu e cambio aki, y kier keda den Reino Hulandes. Pues esnan cu ta fulmina contra Gobernador y contra Rey Willem Alexander ta limita na un grupito chikito so", lider di MEP Evelyn Wever-Croes a duna di conose den su presentacion den Parlamento.

CON SOLIDO NOS MONEDA TA?
Un punto cu e fraccion di MEP a enfatisa hopi durante e reunion ta e solides di nos moneda. Esaki ta depende di e reserva di devisas. E reservanan di devisas a cai bastante desde ciere di refineria. Minister Bermudez a duna di conose cu Aruba ta para na 200 miyon di reserva ariba e limite aceptable cu ta mas o menos 8 luna, y tempo cu e refineria tabata opera esaki tabata 10 luna. Sinembargo e lider di MEP no ta trankil: "Desde cu Mike Eman a tuma mando den e pais aki, e desgracia financiero a cuminsa, y nos reservanan di devisas a baha cu 400 miyon den apenas 5 anja. Ta den cuanto anja Mike Eman lo logra caba cu e 200 miyon adicional cu nos tin? Den 2 pa 3 anja? Esey ta algo cu tin mi hopi alarma, pasobra si nos yega den e zona di peliger cu nos reservanan, nos florin ta core peliger. Pesey fraccion di MEP ta urgi Minister Bermudez pa no laga nan desmantela e refineria. No tin pura, pasobra Valero tin te november 2015 pa haya un cumprado segun e 'settlement-agreement'. No desmantele awor, ban sigi busca. Nos pais mester di e refineria pa asina crea un di dos pilar economico pasobra awor ta riba un pata economico Aruba ta para, mescos cu un flamingo. Pa fortifica nos reserva di devisas, y pa duna empleo na nos hobennan cu ta studia den sector tecnico nos mester tene e refineria como opcion",

AVP A VOTA CONTRA NOS STATUS APARTE Y NOS MONEDA
Finalmente lider di MEP a remarca cu e ta contento di mira partido AVP cambia di postura. "Un partido cu un ideologia CONTRA nos pais, cu a vota CONTRA nos Status Aparte, contra nos Banco Central, contra nos Parlamento y contra nos moneda, awor ta realisa e importancia di e lucha di Betico Croes den felis memoria, y awe ta bin para banda di MEP pa aproba e cambio di moneda. Nunca ta laat pa coregi un eror", Evelyn Wever-Croes a finalisa

Expresionnan haci den e articulo aki no necesariamente ta refleha opinion di ArenaPoliti.co