Durante conferencia di prensa semanal di fraccion di AVP Parlamentario Mervin Wyatt-Ras a trese padilanti cu den e siguiente dianan lo trata den Parlamento dos ley cu ta regarda salud di nos pueblo y cu lo hisa calidad, esta e asina yama Landsverordening Kwaliteit in de Gezondheidszorg y e Landsverordening Beroepen in de Gezondheidszorg. Diabierna Minister cu ta encarga cu nos Salud, dr. Schwengle lo duna un presentacion di su maneho y di e ley encuanto calidad den e comision parlamentario encarga cu Salud y Asuntonan Social. Wyatt-Ras a trese padilanti cu e leynan presenta ta moderno y ta importante pa reglamenta pa garantisa calidad.
Pa loke ta trata e ley di Calidad di Salubridad, esaki ta consisti di 5 capitulo. Capitulo un ta mas general, ta defini e diferente aspectonan manera kiko ta cuido, organisacion, instituto, esun cu ta duna cuido, e profesional cu ta duna cuido, cliente, inspeccion, registracion, etc. Capitulo 2 ta defini di cuido y su calidad. Esaki ta ensera  cu cuido mester ta dirigi ariba clientenan, logra metana y cu esnan cu ta duna cuido mester responsabel y traha segun standardnan. E capitulo aki ta trata alavez organisacion, supervision, control, mehoracion di e calidad di cuido y Landsbesluitnan cu por ser traha pa regla un ke otro. Alavez tin den e capitulo aki regla cu tin cu traha relato annual pa por evalua maneho di cuido cu lo tin cu ta cla promer cu juni di e anja, entrega y comision di kehonan (articulo 9-1), 
capitulo 3 ta regarda e Instituto di Calidad. Su tarea ta pa formula cuadronan pa normanan, protocolnan, standardnan y indicadornan, duna conseho na gobierno entre otro tocante evaluacion di diplomanan di exterior y evalua capacidad di profesionalnan. Capitulo 4 ta trata Supervision y con pa atende y trata cu kehonan. Aki inspeccion lo ricibi un rol mas prominente, unda inpector lo haya mas instrumento pa por haci su trabao di supervision y control di calidad. Capitulo 5 ta trata mas instrumento pa inspeccion haci su trabou mas efectivo manera entre otro e boet cu por ser duna. Por ultimo tin Capitulo 6 cu tin e stipulacionnan di indole transitorio.Wyatt-Ras ta trese padilanti cu lo reuni cu diferente actor den e sector di Salubridad pa por haya nan opinion y sugerencianan, esta dokternan di cas, specialistanan medico, ODEA, bond di hospital, SEPA, Hospital, AZV, boticarionan y otro profesionalnan of instancianan. Wyatt-Ras ta mira e ley cu ta reglamenta calidad di cuido como positivo pa nos pueblo. E hecho cu ta papia di cliente envez di patient ta fortifica e caracter social di e ley E clienter ta central y dor di reglamenta por garantisa cu e calidad di nos cuido medico lo bira mas halto. Na un otro occasion lo elabora aribe e otro ley.

Oranjestad, 30 di oktober 2014

Expresionnan haci den e articulo aki no necesariamente ta refleha opinion di ArenaPoliti.co