Parlamentario Mervin Wyatt-Ras ta trese padilanti cu diabiern minister di Salud, dr. Alex Schwengle durante reunion cu a trata e ley di Calidad di Cuido, a entrega comision parlamentario encarga cu salud un exemplar di su vision pa Salubridad 2014, titula “Visie document 2014”. Den e documento aki e ta presenta su vision pa cu e tereno di Salubridad, Deporte y Cuido di nos Grandinan pa anja 2014. E documento ta consisti di 6 capitulo. E promer capitulo ta trata calidad di cuido y ta ensera cambionan den inspeccion di salubridad, registro di calidad pa diferente profesion riba tereno di salubridad, fortificacion di eerste lijn,  accesibilidad di cuido, tempo di espera pa haya docternan, concientisacion di patientnan riba nan derechonan/debernan y e proceso di stimula cuido di salud. E di dos capitulo ta ensera e cuido di nos grandinan, locual ta ensera formalisacion di nivel di cuido, optimalisa calidad di e personal, promove y optimalisa cuido na cas di nos grandinan. E di tres capitulo ta ensera deporte. Aki lo stimula tur mucha y tur cuidadano en general pa haci deporte y lo stimula alavez topsport. Capitulo 4 ta ensera financiamento duradero di cuido. Aki lo evalua y balancia entradanan y gastonan. Lo investiga posibilidadnan di alternativanan di medionan/fluho financiero. Capitulo 5 ta trata ampliacion y renobacion di hospital HOH y ta evalua con pa baha cantidadi di patientnan pa exterior y reorganisacion di landslaboratorium.

Expresionnan haci den e articulo aki no necesariamente ta refleha opinion di ArenaPoliti.co