Aduana di Aruba a ricibi 5 auto di servicio nobo! 

ORANJESTAD - Durante siman Director di Departamento di Aduana di Aruba, Sr. Roderick Croes a comparti e grato noticia cu e Departamento a ricibi 5 auto nobo cu lo wordo uza den diferente sector manera, ‘Douane Recherche Sectie Haven’, ‘Douane Recherche Barcadera’, ‘Hoofdkantoor Directie San Nicolas’ y ‘Vrijmaking Sectie Stad’, entre otro.

“Algun tempo pasa nos a perde algun auto, nos tabata tin hopi falta di autonan di dienst. Sigur nos tabata tin ‘tekort’ na auto den nos departamento y aworaki danki na Minister tambe nos a logra haya 5 auto nobo”, asina director Croes a expresa.

Ademas di mudansa recien pa e edificio nobo temporal na “Budlex Building” y e autonan nobo, tin hopi mehoracion y desaroyo cu a tuma luga den e ultimo siman nan manera e 2 cachonan nobo cu seccion di ‘Douane Recherche’ a ricibi for di Hulanda. Na mes momento a recluta y apunta tambe dos miembro di cuerpo pa guia y fungi como trainer pa e cachonan di cual ya caba nan a inicia e curso y preparacionnan aki.

Tur esten e tereno pa e futuro edificio nobo di Aduana na Barcadera ta disponibel caba, pues semanalmente Minister Bermudez ta reuni cu Sr. Croes riba e desaroyonan pa cu e futuro edificio nobo aki. Na mes momento e edificio bieu di Aduana tambe lo wordo bendi den transcurso di e proximo lunanan/aña y tambe lo tuma luga un re-alocacion di Cuerpo di Aduana na aeropuerto cu ta forma parti tambe di e plan di renobacion di AAA.

Manera Minister di Finanzas, Angel Bermudez a expresa na varios ocasion e Departamento di Aduana tin su debido atencion ya cu e departamento aki ta un di e dos generadornan di entrada pa Gobierno, pues tin varios aspecto cu tin prioridad halto riba su lista pa cumpli cun’e. Di e forma aki tin varios adelanto y desaroyo cu ta tumando luga y cu sigur lo hisa e calidad, nivel di servicio y trabounan cu Cuerpo di Aduana ta eherce.

Segun Director di Aduana, e plannan ta canando y e reaccion di parti e coleganan ta positivo. “Aworaki nan a cuminsa mira por ehempel cu e condicionnan di e edificio temporal ta hopi mas miho di locual nan tabata traha den. E coleganan ta contento, entusiasma pa cu e ultimo desaroyonan y esaki sigur a trece cun’e un sentimento di union di Cuerpo di Aduana”, asina Sr. Croes a expresa.

Expresionnan haci den e articulo aki no necesariamente ta refleha opinion di ArenaPoliti.co