Oportunismo di marca mayor!!! 

Cambia bo opinion segun ta cumbini bo ta un arte di mal politiconan. Nan ta capaz di bisa tur cos pa hende tende loke nan kier tende. E problema ta cu nan ta cambia loke nan ta bisa, dependiendo di cu ken nan ta papia of con e ambiente ta. Un bon ehempel ta loke MEP a haci y ta bisa over di e belasting di BBO.
MEP a introduci e BBO pa haya mas placa. No pasobra nan tabata tin mester di mas placa pa un proyecto of pa haci algo pa Pueblo. Al contrario. E añanan 2007/2008 ta segun MEP mes, e miho añanan di economia y finansa di Aruba. MEP a bisa cu e ta e añanan cu economia a crece mas (crecemento di GDP) y di entradanan di gobierno. Tog MEP a haya necesario pa introduci e BBO y impone esaki riba comercio y pueblo contra di tur conseho di tur instancia. A impone esaki riba un di e poco productonan di exportacion di Aruba: e productonan cu e refineria ta produci. Esaki a causa e seramento di e refineria poco tempo despues. E problema principal di e BBO: e ta acumulativo y ta causa aumento innecesario di costo y prijs. Pero tin bon noticia: na januari ta bay elimina e BBO cu su structura acumulativo.

MEP: pro-contra-pro
For di comienso MEP a purba duna e BBO un cara bunita y bisa cu e ta pa cambia e sistema di belasting di directo pa indirecto. Tambe MEP a bisa cu e BBO ta cubri gastonan di proyectonan pa pueblo. Pero en realidad MEP a introduci BBO djis pa haya mas placa, pero nunca e placa aki a bay den proyectonan pa Pueblo. MEP a defende e BBO cuesta loke cuesta. Ora AVP a anuncia y cuminsa corta e BBO, MEP a bisa cu corta BBO ta un mal desicion, pasobra GOBIERNO di AVP lo haya menos placa. MEP a bisa cu mester mantene e BBO. Ora gobierno di AVP a stop di corta e BBO y a hinca placa directamente den saco di Pueblo, MEP a bisa cu esey tambe ta mal maneho y mal gastamento di placa. AVP a introduci e aumento di onderstand, placa pa muchanan di scol, indexering pa trahadornan di gobierno, placa pa trahadornan di sector priva cu un salario te 2500 florin, placa pa pensionadonan, viuda y huerfanonan, pasobra pueblo no a ripara mucho di e cortamento di e BBO. Ora AVP a introduci e BAZV pa laga 1.2 miyon hende paga pa cubri gastonan di cuido di salud, MEP a condena esaki y a yam'e aumento di BBO: un medida segun MEP. Ora CFT, cu MEP mes a pidi pe, a bisa cu mester aumenta e BBO, AVP a bisa no. MEP a bisa cu AVP no ta sigui bon conseho di CFT. E realidad ta cu si MEP no a impone e BBO, awe e refineria lo ta habri ainda y costo di bida lo ta hopi mas abao.
Conclusion: e posicion di MEP riba BBO ta uno cu ta varia dependiendo di e momento, si nan ta den gobierno of cu ken nan ta papia. Esaki ta loke bo ta yama OPORTUNISMO. No un posicion fiho cu pueblo ta spera di politiconan. Pa AVP e belasting di BBO nunca mester a bin. Pesey na januari awor ta bay elimin'e y en especial e structura acumulativo cu a causa cu costo di bida a subi tanto.

Expresionnan haci den e articulo aki no necesariamente ta refleha opinion di ArenaPoliti.co