Prome Minister Eman a bishita Waterloo Region 

ORANJESTAD – Prome Minister di Aruba, Mike Eman tabata tin un agenda sumamente druk e ultimo siman aki. E mandatario di Aruba ta na Canada como orador invita di ‘The Toronto Global Forum’, organisa pa ‘The International Economic Forum of the Americas’ y banda di a participa intensivamente den e forum como orador, a asisti na varios foro durante e periodo di e conferencia. Banda di esaki, Prome Minister a pone tambe varios reunionnan cu varios Universidad, grupo di dirigentenan di institutonan priva y publico riba su agenda. Cu asistencia di Embahador di Reino na Canada, Sr. Anne Gerard van Leeuwen, e bishitanan a proba di ta hopi fructifero pa pais Aruba.

E encuentronan aki tabata un parti importante di e programa pa maximalisa e presencia di e delegacion di Aruba na Canada. E reunionnan aki tabata acopla na un vision cu Gabinete Mike Eman II ta desaroyando pa pais Aruba. “Nos ta enfocando pa e esfuerso cu nos ta haciendo riba tereno di sostenibilidad por wordo traduci tambe den un industria nobo, unda cu Aruba ta bay exporta conocemento.” El a señala cu e conocemento aki ta bini for di institucionnan estableci na Aruba – manera TNO, Rietveld Academie, Scheepvaart School Rotterdam y pronto Green Faculty – y tur esakinan ta cay dentro di e pensamento di creacion di un desaroyo economico nobo pa Aruba. Y den esaki ta bay enfoca riba exporta conocemento. Esaki, segun e mandatario a splica, ta hiba Aruba hopi lihe na e concepto di “startups”, cual lo duna Aruba un nomber hopi grandi internacionalmente. Den cuadro di esaki ta surgi oportunidad pa entrepreneurnan hoben di Aruba por capitalisa riba e oportunidadnan aki.

Na Canada Prome Minister Eman y su delegacion a cera conoci cu e municipio Canades Waterloo, unda tin un cantidad grandi di oportunidadnan cu a surgi a base di un vision hopi particular di desaroyo di conocemento, algo manera Sillicon Valley. Na Canada tin Waterloo Development unda tin municipionan cu algun universidad banda di otro y a desaroya un sinergia cu a crea un industria di personanan hopi creativo den mundo digital, diseño, di invento y innovacion, cu “ta apela na nos pensamento di locual nos ta haciendo hunto cu nos Buro Innovatie, riba tereno di sostenibilidad, loke nos ta haciendo cu nos partnernan pa posiciona Aruba como un hub.”

E dia a habri cu reunion cu Alcalde di Waterloo Dave Jaworski unda a haya e informacion con nan a realisa e concepto pa haci Waterloo asina famoso como un centro di conocemento y pone e desaroyo di e area aki na e estilo di Sillicon Valley.

Loke cu a causa impresion cerca e mandatario ta e conocemento di e area aki riba con ta structura un esfuerso asina di sector particular y sector publico y ta locual “nos a bin intercambia di pensamento cu nan pa haya conocemento”. A topa cu varios personalidad, tanto di e banda politico, di esnan cu ta dirigi e universidadnan, di e asociacion cu ta organisa e esfuerso conhunto di sector publico y priva, a papia cu ingeniero- y arkitectonan.

Interesante tabata e bishita cu e delegacion a realisa na Community Tech cu ta e centro unda ta bini hunto tur esnan cu kier trece algo nobo. E personanan aki ta haya e apoyo necesario tanto prome y durante cu ta realisa e iniciativa comercial/economico/innovacion cu ta tumando. Hustamente den e parti aki Prome Minister Eman a mira hopi similaridad cu Aruba, y e ta kere cu esaki lo yuda Aruba cu un aspecto nobo di desaroyo economico cu ta basa riba vision di innovacion y acopla na e meta di sostenibilidad di Aruba.

Despues di a tuma un dia pa topa cu funcionarionan importante den sector di innovacion, e mandatario a tuma tempo pa atende prensa di Canada y promove Aruba grandemente, entre di tur loke e isla ta haciendo riba tereno di maneho sostenibel. Ta bay demostra Aruba como un pais cu a bin ta trahando riba tereno di sostenibilidad y ademas di aspectonan conoci di bunitesa, hospitalidad y industria turistico, tin un vision grandi cu ta di importancia pa resto di mundo, ofreciendo otro paisnan grandi e conocemento cu Aruba a adkiri. E ta un producto cu paisnan grandi tambe por haci uzo di dje, Eman a duna di conoce. 

Expresionnan haci den e articulo aki no necesariamente ta refleha opinion di ArenaPoliti.co