Creando cupo di trabou, pa engrandece Aruba como lider y beneficiando e ciudadano. 

ORANJESTAD – Como titular di Ciencia, Innovacion y Desaroyo Duradero, Prome Minister Mike Eman a anuncia ayera un oportunidad grandi cu por trece multiple beneficio pa Aruba. Retrofitting ta e conversion di aparatonan domestico y red di iluminacion pa un sistema mas eficiente den consumo di energia. Esaki ta aplicabel tanto pa sector publico, priva y hogarnan rond di Aruba.

E mandatario ta combenci cu nos pais ta asina leu cu ta ora pa companianan di electricidad y cu ta importa productonan electrico y electrodomestico, cuminsa traha y expande riba esaki. E resultadonan ta positivo pa tur e partidonan envolvi caminda ta crea cupo di trabou, ta aporta na e conversion di e isla pa sostenibilidad y ta alivia e gasto di e ciudadano, comerciante of organisacion.

“Nos kier bay duna un impulso grandi na un industria nobo cu nos ta kere por bay man den man cu e henter e vision cu Aruba tin pa ta un pais sostenibel,” asina Premier Mike Eman a señala. “Empresanan  tin un oportunidad grandi pa ofrece na nos comunidad sea na hogar of empresa pa haci henter un retrofitting den nan organisacion.”

Por comberti tur aparato den cas, sea ta luz, sea ta frigidaire of un airco, den aparatonan hopi mas eficiente. Esaki tin su ‘ripple effect’ den nos economia tanto na cas como na nivel nacional. “Cu tempo largo nos ta bay logra cu nos a haci un cambio hopi grandi pa loke ta consumo di energia den nos pais, na un forma mucho mas responsabel y mucho mas pagabel pa cada famia y organisacion na Aruba,” Minister President Eman a splica.

E mandatario a indica cu di e manera aki ta yega atrobe na un punto excepcional cu Aruba ta cana dilanti no solamente den e aspecto di conversion berde pa mehora calidad di bida acopla na e vision cu nos tin pa nos pais, ta sigui engrandece e nomber di Aruba como un lider den e tereno aki, pero tambe ta traduci den resultado directo pa nos ciudadanonan.

Expresionnan haci den e articulo aki no necesariamente ta refleha opinion di ArenaPoliti.co