Recientemente e economista sr. Rob Henriquez a comenta cu, den su concepto, CAft lo a basa su raportahenan completamente riba e cifranan cu ta wordo suministra, y probablemente no a tene cuenta cu e integridad di e cifranan.
Minister Plasterk atrobe a haci un bishita relampago na nos isla y a duna di conoce cu politiek Den Haag lo ta satisfecho cu e esfuersonan cu e gobierno di Aruba ta haci pa mehora e deficit financiero cu e mes a ocasiona. Sinembargo Hulanda no ta sali ileso for di esaki, pasobra nan a ignora señalnan cu nan a haya e.o. di UPP riba e derochamento di placa y corupcion cometi pa e gobierno di AVP.
E pregunta di UPP ta: riba ki dato y cifranan politiek Den Haag lo ta basa nan opinion, pasobra te ainda nos no por a haña un bista drechi si e cifranan cu gobierno lo a suministra CAft, y pues tambe politiek Den Haag, tin un base real y ta di confia.

Lagami duna un ehempel di con ta manipula cu cifra, y den e caso specifico aki cu cifranan di desempleo.
Gobierno den persona di sr. Mike Eman y sr. Rene Herde, a publica cu desempleo na Aruba a baha di 11-12% den pasado pa 7.5-8% awor aki.
Minister Paul Croes a trata na ta un poco mas specifico y a duna di conoce cu desempleo tabata 11% na 2012 y na 2013 a baha te cu 7.6%.
Na e mes un momento DAO a publica e resultado di un encuesta cu nan a conduci na 2013, y a yega hasta na e cifra di 6.7%.
Na 2014 minister Paul Croes a rectifica e cifra di desempleo - cu anteriormente e mes a declara di ta 7 mil persona - pa 4700 persona, y a laga sa cu e cifra di desempleo lo ta 8%.
E ultimo cifra cu CBS a publica, ta data di 2010, na unda a haci mencion di un desempleo di 10%.

Ya caba nos por a constata cu e cifranan ta varia masha hopi mes, y cu ta basa esaki awor aki riba un encuesta cu DAO lo ta conduci anualmente.
Na NoticiaCla sinembargo, e minister atrobe a trata di defende e cambio di e ley 1613X, indicando cu tin 22.8% di desempleo cerca hobennan, 1350 persona sin trabou cerca esnan riba 50 aña di edad, 2500 persona cu ta cobra onderstand, y 1300 persona cu ta traha via uitzendbureau.
Si mi haci un calculacion rapido, mi ta yega na un cantidad di alrededor di riba 7 mil hende sin trabou, of sin trabou fiho na Aruba.
Esaki ta trecemi back na e declaracion di sr. Henriquez.
No waak e cifranan so, pero dedica atencion na e integridad di e cifranan. Ta hunga constantemente cu e cifranan, y ta trata na presenta un cuadro mucho mas suave y acceptabel di loke e realidad mes ta.
Hopi hende no ta na altura, of no ta realisa e consecuencianan grave cu e falta di transparencia aki di gobierno tin pa e futuro economico y financiero di nos isla.
Na prome lugar ta keda duna probablemente cifranan irealistico y manipula na CAft, pues lo mester cuminsa cuestiona tambe e raportahenan di CAft.
Na di dos lugar ta keto bay duna permiso pa extranheronan bin establece nan mes aki, y keto bay ta permiti pa un esclavitud moderno wordo practica aki na Aruba tambe.

Te hasta a dicidi cu e stranhero despues di 3 aña no mester bai DPL mas pa "toetsing" riba mercado laboral pa mira si tin Arubiano (sigur nos hobennan) pa haci e trabounan aki.
Mayoria di persona cu ta haña permit pa traha aki, ta personanan cu ta bay haña un minimumloon. Ya caba e cantidad di hende cu minimumloon, a mustra un aumento dramatico. Esaki pa motibo di ciere di Valero pa locual mayoria di hende ta haña trabou na hotelnan.

E desaroyo financiero pesimo di Aruba ya caba tabata tin como consecuencia cu un gran parti di nos clase media a cuminsa desaparece. Esaki hunto cu e avalancha di medidanan cu gobierno ta masacrando pueblo cu ne, tin como resultado cu gobierno lo por spera menos entrada door di impuesto, y lo wordo obliga pa hisa e impuesto/ABB di tal forma cu lo por yega na cumpli cu e exigencia di CAft pa reduci e deficit financiero na e cifranan palabra den e protocol firma na 2015 cu Plasterk.
En corto, mas persona cu minimumloon, clase media desapareciendo, mas habitante di Aruba cu no tin trabou, menos entrada pa gobierno locual lo nifica mas medida.

Y toch ta sigui permiti extranhero bin traha na Aruba, y ta sigui haci negoshi cu permisonan. E resultado final lo ta un pueblo pober y cu hamber, introduccion di sclavitud modern, y un aumento di criminalidad.

Banda cu ta fomenta asina ey pobresa aki na Aruba door di un maneho financiero pesimo, ta importa pobresa tambe door di e.o. duna hendenan riba 60 aña permiso, cu no tin entrada, consecuentemente ora cu nan inscribi nan mes na Censo, lo NO bay paga ni UN CEN PRETO NA PRIMA DI AZV.

Y pa completa e obra, ata ta bay di acuerdo pa kita e visa pa e Colombianonan, siendo cu TUR consehonan di instancianan local tabata negativo, cu excepcion di e departamento cu ta djis papia loke e minister kier pa nan papia, esta ATA.
Akinan nos no mester perde for di bista cu e colombiano cu tin e potencial financiero pa bin cu vacacion Aruba, y NO ta bin pa keda, no mester di visa mes, pasobra 80% di esakinan tin un visa Americano caba, y cu e visa ey nan por drenta Aruba caba.
Dus aki atrobe ta habri caminda pa importa mas pobresa na nos isla.
Un scenario oportuno tambe pa e gobierno di Reino sigui cu su afan pa domina nos isla pa medio di ”verdeel en heers”.

UPP ta keda persisti, y insisti tambe den su afan pa logra convence nos pueblo cu e unico salida di e circulo vicioso maligno aki, ta UNION.
Realisacion di un COMPROMISO NACIONAL lo nifica cu lo mara e man di e politico, cu lo establece ordo y disciplina atrobe a base di e reglanan di bon gobernacion.
" UNITED WE STAND, DIVIDED WE FALL!!"


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, november 5, 2015

Expresionnan haci den e articulo aki no necesariamente ta refleha opinion di ArenaPoliti.co