Gabinete ME II: Estudio di ‘Verificateur’ di Aduana a bira un realidad
ORANJESTAD - Dialuna atardi na Universidad di Aruba, Minister di Finanzas, Angel Bermudez den compania di director di departamento di Aduana, Sr. Roderick Croes y representante di ‘Belastingdienst Centrum voor Kennis en Communicatie’ (BCKC) a inicia oficialmente un estudio di aproximadamente 2 aña pa logra e rango di mas halto den cuerpo di aduana, esta un ‘verificateur’.
E mandatario di finanzas den su discurso a reconoce cu Departamento di Aduana lo sigui enfrenta retonan grandi den e proximo añanan, principalmente debi na cambionan internacional riba tereno di impuesto, unda cu varios pais ya caba a adopta e sistema di cobranza y pago via impuestonan indirecto en bes di impuesto directo.
Ademas e dignatario a sigui splica cu e miembronan di aduana awendia ta enfrenta un expansion di tareanan cu mester wordo desplega den nan area di trabou. Minister Bermudez a reitera cu e trabounan diario ta bay mas leu cu protege nos fronteranan y comunidad contra importacion di productonan ilegal. “Cuerpo di Aduana ta un di e dos fuentenan principal di ingreso pa Gobierno, a yega e momento pa nos sigui eleva e calidad di nos duaneronan”, asina e mandatario a expresa.
Segun Minister Bermudez, e limitacionnan financiero ta haci’e hopi mas dificil pa inverti den nos Cuerpo di Aduana, sin embargo e ta algo sumamente necesario. “Cu e estudio aki nos ta inverti den e formacion y experiencia di nos duaneronan, sin embargo cada miembro di nos cuerpo tambe ta inverti nan tempo y esfuerso den nan futuro carera, y mi ta sigur cu asina cu nan formalisa e estudio aki cu exito, nan lo por enfrenta nan responsabilidad profesional di un manera mas optimal”.
E ceremonia di apertura a finalisa cu un reconocimento na sr. Falcon ‘Toko’ Tromp cu tabata un di e prome verificateur na Aruba y cu na mes momento a comparti varios anecdota tempo cu e la eherce su funcion aki den Cuerpo di Aduana.
Minister Bermudez a recorda tur participante cu a inicia e curso di ‘verificateur’ cu no ta solamente e conocemento ta importante pero tambe nan integridad y conducta profesional. Na mes momento e mandatario a desea e grupo completo hopi exito y na tur docente tambe hopi sabiduria pa asina completa e estudio aki un forma satisfactorio.
Expresionnan haci den e articulo aki no necesariamente ta refleha opinion di ArenaPoliti.co