Dialuna Cuerpo di Aduana a celebra Dia Internacional di Duanero. Minister di Finanzas, Angel Bermudez sigur a comparti cu tur e duanero y tambe esunnan di bishita for di Corsou riba e dia special aki.

E celebracion a cuminsa durante fin di siman caba cu diferente actividad manera weganan di volleyball, futbol di sala, softball, entre otro. Dialuna mainta a habri cu un bunita santo sacrificio di misa na Dakota cu un tremendo coro y sigur e palabranan motivacional di Pastoor Jairo Maduro. Minister Bermudez a tabata sumamente contento cu e misa y den su mesun palabranan e mandatario a expresa, “e misa a demostra e disciplina y union cu ta reina den henter e cuerpo di duana a pesar di e circunstancianan”.

Despues di e bunita misa, ‘Douanedrum band’, ‘Peloton’, ‘Hondenteam’ y ‘Gasten Douane Corsow’ a marcha hunto cu orguyo y disciplina te na oficina principal di Duana pa asina inicia cu e ceremonia di Dia Internacional di Duana.

Na prome instante e dignatario a felicita tur e duaneronan cu finalmente a ricibi nan decreto cu ta formalisa nan posicion legitimo den nos cuerpo di aduana y tambe a desea cada un tur hopi exito den carera. Na mes momento e mandatario a extende un palabra di gradicimento tambe pa e pasenshi di cada miembro di duana cu durante hopi tempo a warda pa formalisacion di nan decreto.

Den su discurso e mandatario di Finanzas a dirigi su mes na tur duanero y famia presente, caminda e la splica cu tur pais na mundo awendia ta enfrenta e mesun dilema; e aumento di volumen di hende y producto cu ta yega na fronteranan, sin cu tin aumento di recursonan pa por enfrenta e desaroyo aki.

Den e mesun rosea comercio y biaheronan ta desea pa e procedura duanero bay lihe, mientras na mesun momento tanto Gobierno y comunidad ta desea proteccion optimal di nan interes, salubridad y siguridad publico. Un tarea dobel cu sigur Cuerpo Duanero di Aruba tambe haci awendia.

Minister Bermudez un biaha mas confirma cu e ta na altura di tur e necesidad di Cuerpo di Aduana y cu di su parti ya caba a cuminsa traha riba diferente aspecto manera leynan cu mester wordo modernisa, ekiponan di scan cu mester wordo drecha, ekipo pa e duaneronan mes cu por enfrenta situacionnan peligroso, servicio digitalisa, uniform pa e duaneronan y sigur oficinanan saludabel pa e ambiente laboral.

Finalmente e mandatario di Finanzas a clausura cu un peticion na un y tur pa manifesta e prioridadnan di cuerpo di aduana pa asina ehecuta e tareanan segun e necesidad, “ami kier ta responsabel pa un cuerpo di aduana di cual  mi por ta orguyoso den tur sentido!”, Minister Bermudez a expresa.

 

Expresionnan haci den e articulo aki no necesariamente ta refleha opinion di ArenaPoliti.co