ORANJESTAD -- Gobierno den 2015 a gasta hopi mas cu e tabata por, y awor ta buscando tur forma pa tapa e buraco financiero cu el'a causa. E forma cu Mike Eman a scohe pa hasi esey ta door di bende propiedadnan di gobierno. Ta trata aki di Hulpbestuurskantoor Noord, ex warda di polis na Wilhelminastraat, edificio di ex Domeinbeheer y edificio den cual Ministerio Publico ta ubica aworaki. E 4 edificionan aki gobierno kier core bende prome cu fin di anja, y ta pensa di haya 11 miyon di nan. 

DICON ESAKI NO TA UN BON FORMA PA SOLUCIONA E PROBLEMA?

1. e no ta soluciona bo problema structural. Si bo tin problema pa paga tur bo debenan fin di luna, y bo ta dicidi awor pa bende un stoel, mayan otro, despues bo auto, bo cama, bo cas, aki poco tempo bo no tin nada mas! Mescos ta conta pa gobierno. Gobierno mester sinja soluciona su problemanan y no bin cu cosnan ad-hoc asina.

2. si gobierno bende e edificio den cual Ministerio Publico ta awe, kiermeen cu mayan e mes mester paga huur na e donjo nobo! Ta mas gasto bo ta crea asina!

3. tin cantidad di departamento di gobierno ta huur edificio y e gobierno aki a bisa cu e ta bai baha huur. Pero al contrario, e gobierno aki a hisa e huur desde 2009! Y awor lo mester bai huur mas ainda. Mihor a renoba e edificionan y pone departamentonan aden pa baha e gastonan di huur. Por ehempel: Rietveld Academie por bai den e edificio di warda di polis, una bes cu e ta renoba. Ambulance por bai bek den edificio di ex Domeinbeheer, un lugar ideal pa ambulance. y asina por pensa riba varios otro solucion, prome cu bende.

4. gobierno awor kier pura bende prome cu fin di anja pa tapa e buraco financiero, na prijs di baca flaco. Cada un di e propiedadnan ey ta riba 'prime-location' y por wordo bendi pa prijs hopi mas halto. Of acaso gobierno kier bende nan na vindishi na amigonan pa prijsnan abou?

Pa varios motibo tanto CAFT, Raad van Advies y nos di fraccion di MEP ta CONTRA e decision di gobierno aki.

Expresionnan haci den e articulo aki no necesariamente ta refleha opinion di ArenaPoliti.co