UPP a tuma nota di e discusion di ultimo dos dianan tocante bendemento di propiedadnan publico, esta propiedad di pueblo.
E hecho cu den presupuesto ta menciona e medida aki pa haya placa al instante, ta confirma tambe e comunicado di UPP di siman pasa, cu mientras Mike Eman ta haci pantomina na Paris y Hulanda, Aruba ta na vindishi.

Siman pasa nos di UPP a adverti di intencion di e.o. bende edificionan di gobierno, y mescos tambe e rumor cu tin di benta di companianan di utilidad di pueblo.
Gabinete Mike Eman ta den un ansha tremendo pa por haya placa, y no ta importe con e ta haya esaki, pero mas bien, banda di laga e pueblo aki bashi, e kier get rid di tur e propiedadnan di nos pueblo. Tur esaki dor di no ta cumpli cu e condicionnan cu e mes a stipula den su protocol firma na mei 2015 cu Gobierno Hulandes.

Asina nos por mira cu edificionan di Hulpbestuurskantoor Noord, Warda di Polis di Playa, Ex Domeinbeheer y OM na Playa (antes Banco Central), ta wordo poni na benta.
E informacion persistente ta cu tin mas edificio cu lo ta na benta.
Por menciona Douane kantoor na Playa, cu tambe lo por wordo bendi, mientras cu tambe tin rumor di benta di edificio di Laboratorio na Playa. Ya caba e ultimo aki, segun nos tin entendi, a wordo desaloha, y loke a keda di e empleadonan, esakinan a pasa pa otro laboratorio.
Den e cuadro aki tambe nos por comprende e intencion di Alex Schwengle pa privatisa e servicio aki. Nos lo bin riba esaki den un otro articulo.

CAft a duna gobierno di Aruba atrobe un mensahe cla y raspa, esta pa percura bo baha bo gastonan.
Pero cu e acto aki di bende edificionan di gobierno, no ta contribui na e aspecto aki.
Bende propiedad ta baha hustamente e “onderpand”, apesar cu ta haya placa mesora.
Pero di otro banda bo mester bay na ubica empleado y servicionan na un otro sitio. Na sitionan cu bo no a traha, y pues cu lo bo mester bay huur. Amenos cu ta intencion pa elimina e servicionan aki.

Apesar cu Warda di Polis na Playa no ta full den uzo, pero nos tin comprendi cu tin parti di esaki cu ainda ta den uzo. Esaki tambe ta conta pa Ministerio Publico.
Cu otro palabra bo gastonan, den e caso aki, esun di huur, lo aumenta aun mas.
Pues loke nos ta mira - y e esaki ta enfatisa nos manera di wak henter e asunto aki - ta cu gobierno, cueste loke cueste kier yega na placa.
Nos a mira esaki caba den e forma con a cambia e asunto di aangifte di ganashi (winstbelasting), benta di e propiedadnan di pueblo, y kizas aki un rato companianan estatal.

Di un banda nos por comprende cu como pais nos lo tin nos obligacionnan.
Pero no por ta asina cu e gobierno aki ta sigui cu e deroche di placa aki, mientras pa haya mas placa, sea ta chica e pueblo aki di un banda y ta bende nos patrimonionan nacional na prijs di baca flaco cu compinchinan.
Tambe keto bay nos ta tende di terenonan cu ta wordo traspasa pa compinchinan pa na nan turno sigui haci negoshi.

Nos ta spera cu Parlamento di Aruba por lanta for di soño y tuma pasonan pa haci e investigacionnan necesario. Apesar cu nos confianza den e Parlamento aki no ta di gaba!
Pueblo mester exigi cu si tin di paga mes, e gobierno aki no ta esun cu tin di sigui maneha nos fondonan publico, y cu no mester bin mas medida, sino bahamento di gastonan innecesario.

UPP ta mira cu despues di a hinca e pueblo den un debacle financiero nunca bisto, e trabou pa e gobierno cu mester bay "ruim op de boel", lo ta hopi dificil.
P’esey UPP ta urgi pa bin cu un gobierno di transicion, cu ta consisti di expertonan cu lo tin como tarea defini e cuadro financiero pa nos pais pa e añanan nos dilanti, pero tambe implementa e condicionnan cu lo mara man di e politico.
Tambe lo mester entama investigacion riba proyectonan dudoso di gobierno.

Nos como partido a trata pa uni e sector politico pa nos por yega na puntonan di salida concreto, pero lastimamente ainda esaki no por a wordo logra.
Ya cu nos ta kere cu salbacion di nos nacion ta na momento cu por logra un UNION pa yega na un Compromiso Nacional, y bin cu cambionan fundamental pa medio di introduccion di reglanan di "Good Governance" manera Nacionnan Uni ta prescribi.
Esaki ta e alternativa cu nos pueblo ta sperando di e mundo politico.

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 15, 2015

Expresionnan haci den e articulo aki no necesariamente ta refleha opinion di ArenaPoliti.co