Entrada total a aumenta cu solamente 3.9 miyon florin na 2015! 

Cu nos pais tin un Promer Ministro manipulado y mentiroso, esey tur hende ta na altura caba di dje. Cu e Prome Ministro aki ta briya cu su incapacidad pa goberna nos pais den forma responsabel ta bisto ora cu lesa su ultimo comunicado, caminda e ta trece padilanti cu supuestamente su gobierno a logra baha e deficit for di 9% te na 3.7% na 2015 y te na 2% na 2016.

1.7 biyon di deficit acumula
Sinembargo Mike Eman ta sigui biba den ‘denial’, ya cu e no kier admiti su culpabilidad pa loke ta e sumanan astronomico di deficitnan cu el a crea durante 2010 pa 2014, esta -188.6 miyon na 2010, -325.2 miyon na 2011, -443.3 miyon na 2012, -332.8 miyon na 2013 y -443.9 miyon na 2014. Pues den total 1.7 BIYON florin acumula di deficit e gobierno di Mike Eman a hinca nos pais aden y esaki den apenas 5 aña.  Esaki tin como consecuencia cu e suma biyonario aki mester a wordo fia y consecuentemente esaki a percura pa un redoblacion di nos debe nacional. Dicon Mike Eman nunca no kier papia riba e parti aki, esta di e Mega debe cu el a crea den apenas 5 aña? Dicon Mike Eman nunca kier papia di e periodo te cu aña 2034, caminda pueblo den tur e añanan aki lo mester bay paga e Mega debe yegando na e nivel di debe cu MEP a laga atras na 2009, esta 40%? Y pa no lubida pago di tur e debenan extra di e proyectonan PPP!

Entradanan total na 2015
Tabata un hilaridad ora mester a lesa locual Mike Eman a skirbi tocante di e entradanan cu gobierno a ricibi na 2015: “Cifranan cu Gabinete Mike Eman a calcula pa loke ta entrada di pais Aruba den 2015 a wordo surpasa”. Cu esaki Mike Eman kier crea e impresion cu ta hopi miyon florin extra su gobierno lo a haya na entrada na 2015, siendo cu den e relato ultimo di Banco Central ta mustra cu ta 1121.8 miyon florin na entrada a ser ricibi na 2015. Compara cu 2014 (1117.9 miyon), esaki ta un aumento miserabel di 3.9 miyon florin, esta 0.3%. Y si compara e entrada total di 2015 cu 2013, esaki ta un reduccion di 21.1 miyon florin. Pues ta bisto cu tur e locuranan di conferencianan green, firmamento di un gran cantidad di MOU’s, tur e viahenan di Mike Eman pa propaganda su sosteniblidad, e campaña pa converti Aruba como un hub pa Sur America, ningun di e locuranan aki no a conduci cu nos pais por a logra haya entradanan significante pa sostene nos finansas publico.

Deficit ta sigui aumenta
Otro apecto financiero cu Mike Eman ta papia di dje, pero cu e no tin ningun conocemento den esaki ta e deficit financiero cu su persona ta premira pa aña 2015. Ta increibel con nos Prome Minister hunto cu lider di fraccion di AVP, Baba Herde tur dia ta vocifera con durante e ultimo añanan structuralmente nan a bin ta bahando e deficit financiero tur aña. Sinembargo segun e ultimo relato di Banco Central, tur cos ta indica cu den e prome 9 lunanan di 2015 gobierno di Mike Eman no a logra baha e deficit financiero di nos pais. Den e tabel adhunto por mira cu den e prome 3 kwartaalnan di 2014 e deficit (Cash) tabata den total 199.3 miyon florin y den e prome 3 kwartaalnan di 2015, esaki a aumenta te na 235.3 miyon florin. Pues un aumento di 36 miyon florin na deficit y cu ta muestra palpable cu no por papia di reduccion di deficit structuralmente.

Finalmente, Mike Eman por sigui papia bunita riba e situacion financiero di pais Aruba, pero historia lo bay condena su persona como esun cu a percura pa hinca nos pais den e abismo financiero y di un debe astronomico cu nos futuro generacionnan lo mester bay paga.

Expresionnan haci den e articulo aki no necesariamente ta refleha opinion di ArenaPoliti.co