ORANJESTAD - Diabierna pa 1:30 di marduga e presupuesto supletorio 2014 a haya su aprobacion den parlamento cu 12 voto na fabor y 8 contra. Despues di un trayectoria basta largo Minister di Finanzas, Angel Bermudez ta spera cu finalmente por conclui e proceso aki cu firma di Sr. Gobernador, Fredis Refunjol prome cu fin di aña.

E presupuesto adapta 2014 ta conta cu varios ahustacion cu ta basa riba e recomendacionnan cu e expertonan di e Secretariaat di College Financieel Toezicht (CFt) a entrega na e mandatario di finanzas. Entre nan ta trata di e deposito di 170 miyon florin den e fondo di pensioen di APFA, pa sigura e pensionnan existente y tambe pa esunnan cu lo drenta na vigor den un futuro cercano.

Fuera di esey, e reservacion pa e fondo di AZV ta e di 2 ahuste y por ultimo un suma di 10 miyon florin pa diferente categorianan cu ta indica cu lo surpasa e suma presupuesta.

Durante reunion e mandatario di finanzas a entrega tambe un nota di cambio cu ta pa aloca e suma necesario pa por cumpli cu e promesa di gobierno pa paga e ‘gelijk bedrag’ na e pensionadonan e aña aki.

Minister Bermudez ta contento cu e aprobacion di e presupuesto y ta spera cu pronto lo por finalisa e proceso completo pa asina e por continua cu e presupuesto 2015 y entrega esaki na tempo manera ley ta stipula. “Awo e palabra final ta keda na Sr. Gobernador kende lo mester firma e presupuesto 2014 y e supletorio pa asina e procedura di e presupuesto aki por yega su final e aña aki”, e mandatario a expresa.

Expresionnan haci den e articulo aki no necesariamente ta refleha opinion di ArenaPoliti.co