ORANJESTAD – Parlamento di Aruba a aproba presupuesto supletorio 2014 di Pais Aruba diabierna mainta un poco despues di 1:00. Segun Prome Minister Mike Eman, cu esaki, un capitulo dificil pa pais Aruba ta culmina.
“Cu aprobacion di Staten ta yega un final na e incertidumbre cu a surgi mita di e aña aki ora cu e presupuesto no a wordo ratifica. E esfuersonan di e ultimo lunanan a habri porta pa dialogo den Reino cu institutonan manera College Financieel Toezicht (Cft), cu a duna nos sosten valioso.”

Prome Minister a declara na final di e debate den Staten cu for di e presupuesto ta evidente cu e prioridadnan di gobernacion ta na sanea finanzas publico. “Cu esey nos ta riba e mesun linea cu Cft. Pa nan tabata hopi importante pa uza e suma preciso den presupuesto cu tabata necesario pa sanea fondo di pension di ambtenaarnan, APFA. Den e presupuesto, manera cu el a wordo traha pa Minister Yrausquin, a tum'e via un stelpost. Mientrastanto a logra calcula e suma exacto di 170 miyon florin pa e por a wordo incorpora. Esey ta conta tambe pa e ingresonan di Health Tax, cu a drenta na vigor 3 luna mas laat cu el a wordo planea pa wordo introduci, esey lo aporta menos e aña aki.”

Eman a confirma cu presupuesto 2015 ta practicamente cla. “E cifranan di e presupuesto supletorio 2014 ta sirbi pa punto di salida pa e presupuesto di e aña binidero.” Esey ta nifica cu mester haci algun ahuste y por entrega e documentonan.” E Prome Minister a reitera un biaha mas cu su gobierno tin como meta pa yega na un desaroyo economico sostenibel cu ta bay man den man cu un finanzas publico sostenibel. “Nos a tuma pasonan grandi caba. Aña pasa nos a reforma AOV, cu a spaar gobierno e aña aki caba 40 miyon florin. Den e añanan cu ta sigui esaki ta bira 60 miyon florin. Restructuracion di e sistema di pension di ambtenaarnan no ta unicamente significa un solucion pa awo, pero ta trece cu ne cu e premienan cu gobierno tin di pone disponibel como dunado di trabou pa baha drasticamente. Hunto esaki ta significa cien miyon florin pa aña.”

Prome Minister Eman a splica cu a baha gasto tambe riba costonan di personal dor di no prolonga contractnan. “Tambe a baha gasto riba ‘goederen en diensten’.” Segun Eman e maneho ta dirigi pa baha e deficit te na un surplus na 2018.”Nos ta keda inverti den poder di compra y den calidad di bida di nos ciudadanonan. E ta awo na gobernador y mi ta spera cu e tuma un decision mas lihe cu ta posibel pa asina nos pais por ta una bes mas riba e caminda normal.”

Expresionnan haci den e articulo aki no necesariamente ta refleha opinion di ArenaPoliti.co