Ta tilda Banco Central di ta produci cifranan cu no tin un base legal ni un meta comun 

Te ainda no tin un claridad riba e diferencia entre e cifra di deficit presenta pa Gabinete Eman y e esun presenta pa Banco Central pa e mesun aña. Den cuadro di esaki nos a manda pregunta oficial pa Minister Bermudez pidiendo un splicacion. Banda di esaki nos a reuni cu Banco Central tambe pa scucha nan splicacion riba e diferencia grandi di e deficit di 2015 pa nos Pais. Locual a resalta di e contestanan di Minister Bermudez ta cu e mandatario ta falta Banco Central respet. Minister Bermudez ta tilda Banco Central di ta produci cifranan cu no tin base legal ni meta comun.

Gobierno y Banco Central ta keda mantene nan cifra 
Minister Bermudez den su contesta na Parlamento ta keda insisti cu e cifranan di Gobierno ta esnan corecto y cu ta Banco Central ta esun cu mester splica ta dicon nan ta publica un deficit cu ta dobbel mas grandi. Pa e motibo aki nos a reuni e siman aki tambe cu Banco Central na unda nos a haya un splicacion di e diferencia y na unda Banco Central a indica dicon nan ta keda mantene nan cifra di deficit na 201,7 miyon enves di e deficit di 98,1 miyon cu Gobierno ta presenta. Banco Central a indica cu pronto nan lo bay publica un splicacion di e diferencia aki.

Falta di respet pa Banco Central 
Remarcabel ta cu Minister Bermudez den su contesta riba nos preguntanan oficial riba e diferencia di deficit pa 2015 ta falta Banco Central respet, bisando cu cu ta obvio cu e cifranan di Banco Central no tin base legal ni un meta comun. Un contesta asina di un Minister di Finanzas den direccion di e Banco Central ta un falta di respet grandi. Pasobra tur tempo ta Banco Central su cifranan ta wordo usa pa instancianan internacional manera Standard & Poor’s, Fitch, IMF, World Bank etc etc. E ta un bofta den cara di e profesionalnan di Banco Central si nan ta wordo tilda di ta produci cifra riba nos finanzas publico sin un base legal. Banda di esaki pa Minister Bermudez bisa cu cifranan di Banco Central no ta sirbi un meta comun, ta un falta di respet aun mas grandi, ya cu Banco Central su trabou ta pa percura pa nos florin no perde su balor y na nos parecer no tin un meta mas comun cu esey.

Tur cu ta cuestiona ta wordo descredita 
E diferencia grandi den cifra pa e deficit di 2015 ta prueba con Gabinete Eman keto bay ta keda haci triki cu nos finanzas publico. Ta hustamente e trikinan aki ta locual ta perhudica nos Pais y pone nos bou di e supervicion financiero di CAFT. Mas lamentabel ta cu Minister Bermudez, kende ta e candidato favorito di AVP pa e funcion di Gobernador di nos Pais, ta presta su mes pa falta respet na un instituto asina importante manera e Banco Central di nos Pais E ta un berguensa cu ta mustra Pueblo e modus operandi di e Gobierno aki. Nan kier descredita tur cu ta cuestiona nan, enves di realisa cu nan ta haciendo cosnan robes cu mester wordo coregi pa asina no perhudica nos Pais.

31 mei 2016

Expresionnan haci den e articulo aki no necesariamente ta refleha opinion di ArenaPoliti.co