Nos ta yegando fin di otro anja, temporada di refleccion riba bida di Hesus, su nacemento, y e speransa pa un bida mihor, cu esaki ta significa. Y esey mi kier pa resalta den mi refleccion, speransa pa mihor temponan. E anja aki tabata un anja dificil pa hopi di nos, y pa Aruba tambe, pero indudablemente tabata tin momentonan bunita tambe. Laga nos ta hopi agradesido na nos Todopoderoso pa e bendicionnan cu nos a ricibi e anja aki, maske con chikito nan por ta. Y laga e bendicionnan aki ta e fuente di inspiracion, e fuente di forsa pa enfrenta e retonan den e anja cu ta bai cuminsa. Mi deseo ta pa den cada hogar reina felicidad, no den e aspecto material, sino den e amor y carinjo, e atencion y e tempo cu bo por na bo yiunan y nietonan. Y mi ta conciente cu tur esaki por wordo realisa solamente si tin stabilidad financiero den nos pais, y si tin oportunidadnan economico y laboral den nos pais. Lo tin pruebanan y retonan grandi nos dilanti, pero nos no mester perde speransa. Dios tin cosnan grandi pa Aruba, nos mester tin FE cu pronto ta bin un cambio.

Anja 2014 a tipifica pa e anja di e decreto real, e KB, y e supervision financiero, e CFT, y sin lubida e welga di hamber, tur esaki pasobra nos gobernantenan no tabata sa di maneha nos pais drechi. Pero e bon cu a sali di tur esaki ta cu awor por lo menos nos conoce e berdad. Y awor danki na intervencion di Gobernador e rumbo di e pais aki a cuminsa cambia: e rumbo cu tabata bayendo den manipulacion extremo (e supuesto bon trabou) pa e berdad duro: e MEGA DEBE. E rumbo cu tabata  bayendo den bacarota financiero a cambia pa e rumbo cu ta bai pa rescate financiero. Awor ta na NOS pa carga nos responsabilidad. E caminda ta largo, CFT a bisa cu lo tarda 26 anja pa nos recupera di e 5 anjanan di gabinete Mike Eman I y II, y pa pone Aruba bek na e nivel cu MEP a lage na 2009.  Pero por lo menos nos a cuminsa encamina e caminda di rescate. E duele cu mi tin ta cu hustamente esnan cu a causa e desatre financiero, no ta sinti e dolor. Ta esnan cu NO a caus’e lo sinti e dolor. E caminda ta largo, pero indudablemente tin mihor temponan na caminda, y nos no mester perde speransa.

Nos di partido MEP lo enfrenta e retonan cu 2015 lo trese cune cu nos solucionnan cu nos a presenta den nos programa di campanja “Aruba Merece Mihor”. Nos lo hasi nos maximo esfuerzo pa duna nos pueblo e alivio cu pueblo tin mester, e pas cu nos pais tin mester, especialmente den Reino Hulandes, pasobra Aruba merece mihor. Partido MEP a demostra di sa goberna, lagando Aruba na 2009 den un situacion financiero stabil. Nos a demostra desde bankinan di oposicion cu nos ta busca solucion. Ta pesey mi a biaha bai Hulanda na momento cu e lider di nos pais, cu pueblo a eligi, tabata busca confrontacion cu Hulanda y mi a pidi e politiconan hulandesnan pasa man riba nan curason den nomber di pueblo di Aruba.

Nos a demostra cu nos SI sa con pa maneha e pais aki, y cu nos ta cla pa cualquier reto. Cu ayudo di Dios nos lo sigi duna e aporte na trese alivio pa nos pueblo.

Den nos plan “Aruba Merece Mihor” nos a trese esakinan padilanti, SIN MANIPULACION  SIN PROMESA FALSO, simplemente CU HONESTIDAD. Y nos ta keda insisti cu e caminda pa sali di nos problemanan ta pa pone orden den e desorden financiero. Nos mester hasi nos sistema di belasting mas simple y mas husto, caminda cu tur hende ta paga locual cu nan debe, sin privilegio pa esnan cu a financia campanja electoral. Nos ta conbensi cu pa sali di e abismo cu nos ta aden nos mester desaroya nos economia, na prome lugar door di NO desmantela e refineria, na di dos lugar, creando un clima di inversion cu ta atrae inversionistanan, y na di tres lugar, bin cu un BANCO DI DESAROYO pa stimula agricultura,cria, pesca y industrianan chikito na Aruba, y asina crea mas empleo pa esnan cu awor ta desemplea. Nos ta conbensi cu mester brinda pueblo alivio y baha costo di bida: prijs di coriente por baha cu 50% si nos bin cu e proyecto di HYDRO CABLE, y prijs di comustibles por baha si controla prijsnan ampliando e canasta basico. Nos ta conbensi cu pa hasi Aruba mas sigur mester pone mas polis riba caya, y cu ensenjansa mester haya un inversion berdadero. Nos ta conbensi cu mester mehora e cuido di salud, apliando e cantidad di specialista, y cu mester duna nos grandinan un cuido digno. Esey ta e solucionnan cu nos a presenta y nos compromiso ta pa sigi lucha te logra esaki.

Mi deseo pa 2015 ta pa nos muchanan por tin ensenjansa di nivel, y lanta den un hogar cu amor y carinjo; cu nos hobennan por haya empleo despues di nan estudio; cu nos famianan por ta fuerte y firme, pa por brinda e yiunan amor y carinjo; pa nos grandinan tin un cuido digno cu nan merese.

Ricibi den nomber di mi casa Kenneth, nos yuinan Christine, Kevin y Claudine, e mihor deseonan pa e anja nobo, y cu den e dianan di fiesta nos dilanti pas por reina den bo curason y bo hogar. Y cu Dios bendiciona cada cuidadano di nos pais Aruba.

Expresionnan haci den e articulo aki no necesariamente ta refleha opinion di ArenaPoliti.co