Cu pais Aruba desde añanan caba conoce un partido politico mentiroso y manipulado, esey no ta ningun secreto mas. Esaki nos por a mira siman pasa atrobe ora cu e lider di fraccion di AVP, Rene Herde a toca e temanan di deficit financiero y crecemento economico di pais Aruba, dunando pueblo e informacion mentiroso cu Gabinete Eman a haci un tremendo trabao riba tereno di finansa publico y economia durante e ultimo 7 añanan. Sinembargo e mentira di mas grandi cu el a trece padilanti ta cu nos pais despues di 2018 - pa prome vez desde Status Aparte - lo conoce un surplus den su presupuesto. Anto riba dje e tin e curashi di declara cu nan lo bay yega na e surplus aki sin cu nan a tuma medidanan contra pueblo, lubidando con Gabinete Eman a aumenta e primanan di AOV, AZV, no a elimina e BBO pero a aumenta esaki cu 2% (BAZV), a hisa e edad di pensioen te 65 aña, a elimina Inflatiecorrectie, a cobra pa piki sushi y pa parkeer auto, a corta den subsidio di e fundacionnan, a aumenta tarifa di coriente, prijs di gasolin, a pluma e turistanan cu taxnan exorbitante etc.

Surplusnan di Gabinete Oduber
Echo ta Rene Herde kier ignora completamente e 8 añanan di e bon gobernacion di Gabinete Oduber, caminda nos pais a registra na 2 ocasion surplusnan den su presupuesto, esta na 2003, un surplus di 4.8% y na 2008, un surplus di 1.0%. Increibel con e mentiroso aki kier sigui manipula mente di pueblo! Alavez Rene Herde kier duna e impresion cu ta algo hopi excepcional su gobierno a haci durante e ultimo añanan, caminda supuestamente nan a reduci e deficit drasticamente, lubidando di splica pueblo cu su gobierno a hereda for di Gabinete Oduber un deficit di apenas -3.6% na 2009 y cu ta danki na AVP e deficitnan a crece te yega na un record di -9.8% na 2012. Locual e no ta splica pueblo tambe ta cu na 2015, esta despues di 6 aña ainda nos pais ta pega cu un deficit substancial di -4.2%, pues un deficit hopi mas halto cu su gobierno di AVP a hereda for di Gabinete Oduber. Y tur e deficitnan aki a yuda na aumenta e Megadebe hamas visto den historia di nos pais.

Revision di GDP real
Pa loke ta e crecemento economico (GDP real) ta parce cu Rene Herde den su ignorancia ta sinta gaba su gobierno pero e no a lesa e ultimo publicacion di Banco Central, caminda nan a ‘downgrade’ e cifra di crecemento economico di 2015. Banco Central a haci un revision di su cifra, caminda na prome instante nan a publica cu e crecemento economico na 2015 tabata apenas 0.1% y despues di revision e crecemento a resulta negativo, esta di -0.5% (un reduccion cu 0.6%!). Tambe Banco Central a ‘downgrade’ e cifra di crecemento economico di 2016, caminda na april di e aña aki nan a premira cu esaki lo ta 1.1% y pa 5 luna luna despues, esta na september den nan revision, esaki a resulta di ta apenas 0.4% (un reduccion cu 0.7%!).

Politico di ‘tira para’
Pues durante 2 aña sigui nos por mira cu nos pais no a dal un stap dilanti pa loke ta nos crecemento economico. Ta increibel cu nos tin un gobierno cu ta hincando miyones y miyones di florin den proyectonan cu no tin ningun prioridad y tambe den conferencianan green, den viahenan rond mundo pa bende Aruba como un ‘Hub’ pa resto di mundo, pero cu tur e malgastamento di placa aki no a cristalisa den un crecemento substancial di nos economia. Pues lo ta bon pa e politico di ‘tira para’, esta Rene Herde cuminsa haci uzo di su inteligencia y cuminsa analisa e cifranan di Banco Central y pa despues sikiera e por substancia tur su ponencia y gabamentonan manipula y mentiroso cu cifranan obhetivo di un instituto imparcial.

Expresionnan haci den e articulo aki no necesariamente ta refleha opinion di ArenaPoliti.co