E areglo pa atende cu diferencianan di opinion enter gobiernonan di paisnan di Reino mester tin e caracter di un corte. E desicion di e instancia aki den tur caso cu e atende mester ta un 'veredicto' cu tur pais ta mara na dje, mescos cu den caso di un veredicto den cualkier caso di corte. No por ta asina cu un pais ta bisa cu e veredicto no ta conta pe of no ta conta pe tur ora. Esey ta punto di bista di partido AVP den parlamento di Aruba. E otro caracteristica importante di e instituto aki ta cu e mester ta completamente independiente di tur gobierno di tur pais di Reino. Corte Supremo di Reino (Hoge Raad) por ta e instancia aki. Pero tambe tin sugerencia pa crea un instancia completamente nobo pa haci esaki.

"Bindend"
Den e discucion den e conferencia di parlamentonan di Reino (IPKO) cu a tuma luga siman pasa, e tema aki tabata esun principal riba agenda. A tuna e conferencia henter dia pa yega a un acuerdo parcial riba e tema aki. Un di e dos puntonan di diferencia entre e delegacionnan di e  tres paisnan di Reino den Caribe (Aruba, Corsow y Sint Maarten) na un banda y Hulanda na otro banda, ta e caracter di e instituto aki. Aruba, Corsow y Sint Maarten ta haya cu e instancia mester por tuma desicionnan cu ta mara e gobierno di tur e cuatro paisnan di Reino. Esaki kier men cu desicionnan di e instituto aki ta mescos cu e veredicto di corte. Nan ta "bindend". Den e delegacion di Hulanda no tabata tin consenso riba e tema aki. Un parti di e delegacion tabata na fabor pa e ta "bindend". Un otro parti tabata contra y algun tabata kier discuti esaki den nan seno prome cu tuma desicion riba e tema.

Tipo di tema
E didos aspecto di e instituto pa atende cu diferencia di opinion entre paisnan, riba cua no a haya consenso tabata e tipo di tema cu e instituto aki lo por atende. Te awor aki a papia di e tema di 'diferencianan di opinion huridico riba interpretacion di Statuut'. Pero otro paisnan di Reino ta haya cu e instituto mester tin e autoridad pa trata diferencianan di opinion of interpretacion di otro asuntonan entre gobiernonan manera leynan di Reino (=Rijkswetten) y desicionnan di gobierno di Reino.

Como cu no a yega na consenso riba e dos temanan aki, a dicidi di duna gobiernonan di e cuatro paisnan encargo pa traha riba e creasion di e instituto nobo aki den e forma cu e parlamentonan a describi. Y pa loke ta e dos aspectonan importante cu parlamentonan den IPKO no a yega na consenso, pa laga e expertonan di gobiernonan trata di yega na un solucion. Na april awor e gobiernonan lo topa y trata e tema aki. Na mei e parlamentonan lo bolbe trata e tema aki si gobiernonan no yega na un acuerdo.

Rene Herde':"E caracteristicanan cu e instituto mester ta independiente, cu e ta duna veredicto cu ta mara tur gobierno di Reino ("bindend") y cu e ta trata en todo caso intepretacion di aplicacion di Statuut, ta essencial pa nos. Nos a pone esey den e mocionnan cu a wordo adopta den parlamento di Hulanda na 2010 y den parlamentonan di Aruba, Corsow y Sint Maarten aña pasa. E tres paisnan aki ta riba e mes un liña aki. Nos ta optimista cu pa april awor tin consenso den henter Reino riba esaki."

Expresionnan haci den e articulo aki no necesariamente ta refleha opinion di ArenaPoliti.co