Proposicion di ley di Aruba, Corsow y Sint Maarten pa regla e ‘geschllenregeling’ ta riba mesa 

“E palabracionnan haci siman pasa entre e parlamentonan di e cuatro paisnan di Reino ta haci cu prome cu e siguiente reunion entre parlamentarionan, lo tin claridad completo si ta bay crea e areglo pa atende cu conflicto entre paisnan di Reino. Nos a palabra caba con e mester ta. Aruba, Corsow y Sint Maarten a hasta presenta un proposicion di ley di reino pa regla esaki. Nos sa cu e proposicion cu Plasterk a haci aña pasa a wordo rechasa door di tur cuatro parlamento. Tambe e parlamento di Hulanda. Pasobra e no ta cuadra cu loke e cuatro parlamentonan a fiha como criterionan pa e areglo imparcial y definitivo di conflictonan riba asuntonan di Statuut entre paisnan di Reino. Awor nos ta bay haya sa si Minister Plasterk por yega na un acuerdo cu e gobiernonan di Aruba, Corsow y Sint Maarten cu ta cumpli cu e exigencianan cu nos a acorda. Esey nos ta bay haya sa pa fin di maart e aña aki. Tur loke falta awor ta si den Parlamento Hulandes tin suficiente sosten politico pa crea un areglo independiente cu ta dicta sentencia cu ta mara tur pais, mescos cu un corte ta haci den tur otro asunto den nos paisnan. Nos ta bay haya sa den e debate cu lo tuma luga den Parlamento Hulandes, si minister Plasterk no presenta prome cu fin di maart, un proposicion cu ta cuadra cu e criterionan cu nos a fiha. Kier men cu pa ora e cuatro parlamentonan bolbe topa na juni e aña aki, nos lo tin claridad completo si e areglo di conflicto cu nos tin seis aña ta boga pe ta bin.” Asina Rene Herdé, lider di e fraccion di AVP a bisa awe den conferencia di prensa di partido AVP. Ela duna relato di e conferencia bi-anual entre e cuatro parlamentonan di e paisnan di Reino cu a tuma luga siman pasa na Sint Maarten. E tema di e areglo di conflicto (“geschillenregeling”) tabata un di e temanan principal.  

2010-2016
E peticion pa crea un ley cu ta regla con y ken ta dicidi ora tin un diferencia di opinio of un conflicto entre dos of mas pais di Reino, ta data for di 2010. E aña ey Juan David Yrausquin y Rene Herdé  di partido AVP, a presenta un mocion pa crea e areglo di conflicto. E no lo mester ta asina dificil, pasobra Statuto di Reino ya ta menciona e posibilidad di un areglo asina. Pero den e mas cu 60 aña di Statuut nunca e areglo a wordo crea. Ora a surgi e conflicto entre Aruba y Hulanda na 2014, partido AVP den Parlamento di Aruba, a bolbe pone e creasion di un areglo di conflicto riba mesa principal di Reino. Aña pasa e cuatro parlamentonan a hasta bisa con e areglo lo mester ta. A fiha cuatro criterio pa un areglo di conflicto. Pero e minister di Asuntonan di Reino te awe no a presenta un proposicion pa crea e areglo cu ta cumpli cu e criterionan aki. Siman pasa na Sint Maarten, e delegacionnan di parlamentonan di Aruba, Corsow y Sint Maarten a presenta un concepto di e ley di Reino cu si ta cumpli cu e crietrionan cu a acorda aña pasa. E proposicion aki lo por wordo presenta na Parlamento di Hulanda na momento cu e tres parlamentonan aki dicidi esey. En caso cu prome cu e siguiente reunion entre parlamentonan na juni e aña aki, Minister Plasterk no logra un acuerdo cu gobiernonan di Aruba, Corsow y Sint Maarten a crea un areglo di conflicto cu ta cumpli cu e criterionan cu a fiha, anto e proposicion di Aruba, Corsow y Sint Maarten, lo por wordo presenta como proposicion di ley na Parlamento Hulandes. Kier men cu pa juni awor lo tin claridad si ta bini un areglo of no. Rene Herdé: “E unico cos cu falta pa haya sa, ta si tin un majoria den Parlamento Hulandes pa crea un areglo di conflicto imparcial cu ta dicta veredicto definitivo riba conflictonan cu tin di haci cu tur asunto di Statuto di Reino. Loke falta ta pa haya sa si tin e boluntad politico den Parlamento Hulandes pa haci esaki.”  

Expresionnan haci den e articulo aki no necesariamente ta refleha opinion di ArenaPoliti.co