Prosperidad comparti 
Bentaha na fabor di hoben profesionalnan 

ORANJESTAD - Tur aña Gabinete Mike Eman ta introduci cambionan positivo cu ta na bentaha di comunidad. E aña aki no ta diferente. Un cantidad grandi di asuntonan bentahoso a wordo anuncia. Esaki despues cu den Conseho di Minister e decisionnan na fabor di pueblo a wordo tuma. Banda di rebaho di coriente y aumento di AOV, bijslag y bijstand, schoolkinderentoeslag y varios otro beneficio, Prome Minister Eman a papia tambe riba pago di studielening  cu pa hopi famia hoben ta un peso grandi. Ora Prome Minister ta haci bishita den barionan esaki ta un di e kehonan cu e ta tende hopi.

Pa yuda e profesionalnan aki cu a regresa nan isla pa traha riba nan futuro y futuro di nan isla, pero ta lucha cu e peso di pago di nan studielening, gobierno cu ya caba a introduci na 2012 un suavisacion di e peso aki pa e studiante cu despues di caba su estudio regresa Aruba dentro di tres cu un reduccion di 30% di su debe. Na 2012 a bin cu e posibilidad tambe pa e studiante cu kier paga su debe den un solo bes haya un rebaho di 30% riba su debe. Diamars den Conseho di Minister a dicidi pa subi e rebaho di 30% pa 35% cu ta encera un suma considerabel. Esaki no ta tur pa loke ta e beneficionan di studielening. Minister di Finanzas, Angel  Bermudez ya a anuncia e extra beneficio di belasting pa esnan cu ta paga riba nan studielening  y durante reunion di Conseho di Minister e decision aki a wordo ratifica. Esaki ta encera cu ora di paga riba studielening e hoben profesional por reduci e suma henter - te un maximo di 10 mil florin -  cu e ta paga di su belasting y no solamente e interes so manera antes tabata e caso. "Cu esaki un peso grandi ta wordo kita di e studiante cu a regresa su isla", Eman a bisa.

Expresionnan haci den e articulo aki no necesariamente ta refleha opinion di ArenaPoliti.co