AVP ta un partido kibra! 

ORANJESTAD -- "Liderasgo di pais Aruba ta debil y kibra, tin cantidad di pleito paden den cas, tin pleito cu comunidad, y tin pleito den Reino.
Desde di su welga di hamber, Mike Eman a bandona e barco cu desde 2014 ta nabegando sin rumbo y poco poco e djacanan a cuminsa bula afo. A apunta un vakminister pa pone orden den e desorden financiero, cu a compara su coleganan minister como ADICTONAN na gasta placa. Ministernan a cuminsa cu un custumber di "drenta, sali". E prome cu a bula afo, Juan David Yrausquin, ya a drenta bek. E di dos sr. Alfonso Boekhoudt cu a wordo cori na mal forma. E di tres Otmar Oduber, cu a laga sa cu Mike Eman no ta sirbi como lider.

RETIRO DI OTMAR ODUBER
Na su retiro, Otmar Oduber a hasi algun expresion cu mester clarificacion di Mike Eman como motibonan di su retiro. Especialmente cu Gobierno di AVP a hasi y deshasi cu e mandato cu pueblo a dune. Tambe Otmar Oduber a declara cu a firma un documento na januari 2016 cu 9 minister, pero ministernan no a tene nan mes na dje. Nos a bolbe pidi sr Eman pa e documento aki, pero no a haya contesta.

RETIRO DI SR. ALFONSO BOEKHOUDT
Ta pa prome biaha den historia cu un gobierno ta retira un minister. "Un di Eman su mesun hendenan cu a wordo escohi pa bira Gobernador, pasobra e mes tabata laat cu su candidatonan, pasobra e mes a faya cu e procedura, anto el'a trata sr. Boekhoudt di e forma ey? Mi a bisa sr. Eman cu e mester pidi sr. Boekhousdt disculpa.
Ademas, mi a exigi di sr. Eman cu e ta paga bek e gastonan di su ultimo biahe pa minister Plasterk cu segun a wordo publica den Notica Cla, tabata puro show. Cu no tabata necesario, pasobra di antemano nan a yega na un consensus riba e texto y no tabata tin necesidad pa bai Hulanda djis pa saca un potret. Pesey sr. Eman meste rpaga e placa aki bek.

NOMBRACION DI JUAN DAVID YRAUSQUIN 
Nos a expresa nos preocupacion pa cu e nombracion aki. Ta stranjo cu sr. Eman no por a haya ningun parlamentario di AVP apto pa e funcion aki.
Pero nos preocupacion ta mas bien basa riba e hecho cu sr. Eman ta manera un gai di pelea cu Hulanda, y awor e ta manda e gay mas brabo di e gayero aki Hulanda, pa busca mas pleito y asina nos ta perde mas autonomia.

NOMBRACION DI RICHARD ARENDS
Porfin gabinete Mike Eman a nombra un minister di asuntonan economico, pasobra e minister Hooijboer-Winklaar y minister de Meza tabata parse mas bien minister di asuntonan comico. Michelle Hooijboer-Winklaar conosi pa su chicken down effect, y Mike de Mesa cu nunca a hasi algo pa economia, solamente energia. Nan dos a neglisha economia, y awor nos ta spera cu e por haya atencion door di sr Richard Arends.

DI 7 MINISTER PA 11 MINISTER
Paga tino si: na e momento aki nos ta pagando 9 minister, plus e overbruggingstoelage di Otmar Oduber, plus e overbruggingstoelage di sr. Boekhoudt, pues nos a bai di 7 minister pa 11 minister!

Expresionnan haci den e articulo aki no necesariamente ta refleha opinion di ArenaPoliti.co