Bisindario di Kiviti contento despues di bishita

Un bario nobo riba un sero na San Nicolas ta reuni un grupo di 50 famia cu diahuebs mainta tabatin oportunidad di combersa cu Prome Minister Mike Eman personalmente. Esey tabata e mas reciente Accion di Bario, iniciativa di e propio mandatario mas cu tres aña pasa, cu fielmente ta realisa semanalmente pa keda den contacto cu pueblo y yuda unda cu por.

“Nos ta contento cu e programa aki tin asina un acogida,” e mandatario a bisa na final di e recorido. “Bo ta wak cu tin biaha habitantenan ta keda cas pa toch por duna nan pensamento riba con nos por mehora nan bario.” Den caso di Kiviti, e invitacion a bin dor di e asociacion di bario lidera pa Jacky Woodley y Swinda Giel.

Premier Eman a sinti cu e habitantenan ta hopi orguyoso di nan bario y cu bo motibo. E tin un paisahe hopi bunita y atractivo for di halto caminda bo por wak parti grandi di pariba di brug. Asina mes, tin deseo pa luz, entre otro cosnan cu por yuda mehora bida.

Prome Minister Mike Eman a splica na tur esnan cu el a papia cu ne, cu actualmente su Gobierno ta preparando un acuerdo cu Elmar pa haya 14 mil punto di luz. Esakinan ta destina pa reemplasa puntonan existente pa reduccion di consumo di coriente. Cu loke ta spaar, ta bay conecta barionan cu no tin coriente ainda. “Den luna di juni/juli lo cuminsa den cada bario pone e luznan nobo. E ta habri caminda pa yuda otro barinan pa yega na luz,” asina e mandatario a bisa.

FCCA tambe tabata presente, hunto cu representante y personal di otro instancianan manera Sociale Zaken, Serlimar, DOW, Gele Koorts Muskietenbestrijding y tambe e Bus di Salud. Mirando cu e compleho di vivienda na Kiviti ta maneha dor di FCCA, tabata esencial pa nan scucha e peticionnan di e habitantenan. “Un deseo cu a scucha hopi awe ta pa haya un cura. Tin cabrito, burico y molester pa cual mester di un cura,” asina Prome Minister a remarca. Tambe ta pidi afstap na algun cas caminda hende di edad grandi ta biba y washok cu por proteha di solo.

Minister President Eman ta contento cu cada siman por ta den otro bario. “Ta ora bo sali bo ta scucha, mira y sinti e necesidad pa mehora.” A base di e practica aki, e mandatario ta sinti cu Gabinete Mike Eman I y II tabatin e informacion necesario pa introduci hermentnan cu ta yuda pueblo. “Ta pesey nos a bin cu e reparatietoeslag, schoolkinderentoeslag y cu ahustenan necesario pa baha prijs di awa y coriente cu 33%.”

E mandatario a conta cu hopi biaha ta wak caso di un ciudadano cu ta biba cu apenas mil Florin di AOV pasobra e tempo ey no tabatin un pension ora yega edad di pension. “A bin cu pension general pa den futuro nan lo ta gradici ora nan wak atras cu ademas di pension di SVB, tambe ta haya un pension di nan empresa paso nos a bin cu un ley asina cu ta hacie obligatorio.” Premier Eman a bisa.

Di e manera aki Prome Minister Mike Eman ta continua cu Accion di Bario, cada bes den otro districto di Aruba. Personanan cu ta topa y papia cu ne ta keda impresiona pa e atencion y interes sincero cu e mandatario tin pa cu e puntonan cu nan ta trece dilanti.

Expresionnan haci den e articulo aki no necesariamente ta refleha opinion di ArenaPoliti.co