Prome Minister Mike Eman a laga sa cu Aruba a sali for di un situacion di crisis na un manera admirabel. Ta tristo pa bisa pero Mike ta bibando den un crisis di fantasia. Den su fantasia na Aruba tur cos ta bon y tur hende ta cana rond contento bibando un bida di 5 strea manera Sheik di Dubai. Den e fantasia aki no tin pobresa, no tin cuenta atrasa di awa y coriente, no tin aumento di schoolgeld, no tin aumento di prima di AOV y AZV, no tin desempleo, no tin deficit, no tin MEGA DEBE, no ta cobra belasting, no tin atraco, no tin ilegal, no tin contrabanda, no tin oposicion, no tin crisis financiero, no ta paga pa recoge sushi, no tin crisis cu Hulanda y huelga di hamber ta algo masha normal. En corto, den e mundo di Mike Eman e unico crisis cu tin ta esun di fantasia.

Admirabel lo ta si den AVP por tin un hende cu por saca Mike di e crisis di fantasia cu e ta biba aden. Desde cu Mike su cabes a flip den huelga di hamber, e no tin mehoracion y e crisis di fantasia a keda gana tereno. Sesion di Go kart no a duna resultado y awor Mike a bin cu mas fantasia cu nunca. Mike ta gaba cu Aruba a sali for di e crisis financiero na manera admirabel. Pa un Prome Minister di Aruba declara esaki promer cu pasa medida mes, ta señal cu su schroef den cabes ta totalmente los. Ban wak ken den AVP tin curashi pa saca Mike di su crisis di fantasia of hale un banda pa libra Aruba di tanto locura.

Expresionnan haci den e articulo aki no necesariamente ta refleha opinion di ArenaPoliti.co