"Hulanda ta cai bou di supervision di e CFT di Union Europeo. Corsow y Sint Maarten tin e CFT cu a wordo crea na 2010 ora e dos paisnan aki a adkiri status di pais autonomo den Reino. Aruba ta e unico pais cu no ta cay bou di un CFT. Esaki semper a molestia gobierno y parlamento di Hulanda. Hasta partidonan di oposicion na Hulanda ta haya esaki straño y a urgi Aruba pa regla esaki. Pasobra experiencia ta mustra cu un organo di conseho y guia financiero ta yuda maneha presupuesto." Rene Herde, ta di acuerdo cu e bentahanan di un organo independiente cu ta yuda prepara y ehecuta e presupuesto. Paisnan rond di mundo, paisnan grandi y chikito, a forma parti di un organo di guia di presupuesto of a crea nan propio organo. Pa bira miembro di Union Europeo hopi pais a sigui e guia di un organo asina. Merca, Canada y Inglatera a crea nan propio organo di guia y supervision di presupuesto y finansa publico. Italia, Francia, Alemania, Hulanda y Belgica a adopta e CFT di Europa. E bentahanan ta cu continuament gobierno y parlamento ta haya informacion, conseho, analysis y señalnan pa usa den prepara y controla e ehecucion di presupuesto. Hopi pais prome y despues di e ultimo crisis financiero y economico a usa fondonan di gobierno pa wanta e slanan di e crisis, pa yuda gruponan mas vulnerabel di nan pais y pa stimula economia. Merca tabata e ehempel mas cla den esaki. Pero hasta un pais manera Hulanda cu no ta kere den stimulacion, a wak nan debe nacional crece te yega 70% den algun aña desde e crisis. Tur e paisnan aki kier preveni un repiticion di un crisis. Pero mas ainda nan kier preveni cu finansa publico hay'e den situacionnan serio pa motibo di kier yuda resolve problemanan causa door di un crisis.

NORMANAN FINANCIERO
Un di e instrumentonan cu gobiernonan ta adopta for di e organonan di conseho y guia financiero, ta normanan financiero. E normanan aki ta bisa cua ta e maximo y minimo cu e cifranan financiero mester cumpli cun'e. E organonan aki ta sigui tur desaroyo den detaye y ta manda señal mes ora cu nan wak algo no ta bay manera planea. Ta gobierno y parlamento mester tuma e señalnan y consehonan aki na serio y actua riba nan. Rene Herde': "E normanan financiero aki ta algo cu nos ta boga pe pasobra nan ta manera boeynan cu ta guiabo den e materia complica di finansa publico. Banda di esey bo kier pa bo maneho financiero stimula economia y no stroba. Bo kier pa e maneho economico crea mas cupo di trabou y no stroba creasion di trabou. Ora e normanan ta bon scoh'i y e señalnan riba desaroyo financiero y economico ta bon, bo por maneha y logra tur bo metanan. Ta eynan nos mester yega. Ta eynan tur pais kier yega. Adoptacion di e normanan y e organonan di guia y conseho aki ta yuda hopi. Pesey nos mester actua lihe y preveni problema den futuro."

ACUERDO CU HULANDA
Gobierno di Aruba a cuminsa traha riba su propio "organo pa guia di finansa publico" for di comienso aña pasa. A invita e institucion mundia IMF pa bin yuda traha e organo di consulta y conseho financiero cu lo mester haya e nomber di "Aruban Fiscal Council". Durante di un di e bishitanan di IMF na Aruba nan a duna un presentacion di nan proposicionnan. Segun e expertonan ta dura mas o menos un aña y mey pa cra un organo profesional y bon organisa asina. E intencion ta pa crea e Fiscal Council di Aruba y mientrastanto laga un organo temporal haci e trabou aki.

Expresionnan haci den e articulo aki no necesariamente ta refleha opinion di ArenaPoliti.co