E siman cu a pasa e fraccion di MEP a pasa henter siman ta busca forma pa stroba gobernacion na Aruba. Den e siman aki nan a entrega dos protesta serca Gobernador. E prome tabata contra di e construccion di e "Green Corridor". E caminda grandi y moderno cu ta bay core di Playa pa San Nicolas y cu ta inclui drechamento di cayanan cu ta conecta cu e caminda grandi. E didos protesta tabata contra di e echo cu den reunion di parlamento a dicidi di no entrega preguntanan por escrito riba e ley pa regula paramento di auto na Playa. A dicidi di laga e espacio completo na tur miembro di parlamento pa haci pregunta durante di e reunion publico. Di e forma aki ta gana tempo sin kita niun derecho di parlamento pa analysa un ley y haci tur envestigacion y pregunta necesario. Ora di yama reunionnan urgente tampoco ta haci pregunta por escrito prome. Pero esey no ta nifica cu ta kita derecho di niun partido den parlamento.

GREEN CORRIDOR
E motibo principal pakico MEP ta contra di e construccion di e Green Corridor ta pasobra nan no ta haya cu ta bale la pena pa inverti placa den e infrastructura moderno aki, cu lo habri posibilidad pa otro tipo di actividad economico y crea otro tipo di trabao "pariba di brug". Loke MEP kier ta pa San Nicolas y vecindario keda manera e ta y depende solamente di si un dia lo por habri e refineria atrobe. Cu e refineria ta sigui daña medio ambiente y salud di hende pariba di brug no ta interesa nan. Pero enbez di bisa cu esey ta e motibo pakico nan ta contra, MEP ta crea e impresion cu e suma cu a fiha pa contruccion di e Green Corridor no ta bay yega. Pesey lo mester traha un ley nobo. Fraccion di AVP a y lo bolbe mustra cu no ta necesario pa traha un ley nobo awor aki, pasobra no tin niun indicacion concreto pa kere cu ta bay surpasa e suma cu a fiha caba. Pero si encaso den futuro lo por surpasa e suma, no ta via un ley nobo, pero ta via e presupuesto di gobierno ta ahusta e suma. Esey a sosode den otro proyectonan caba. Incluso den proyectonan di gobiernonan di MEP mes.

AUSENCIA DEN PARLAMENTO
Diabierna MEP a entrega su didos protesta pa Gobernador pasobra segun nan tin dictadura den parlamento. E bedad ta cu MEP ta falta trabao asina hopi, cu den nan ausencia e fraccion di AVP si ta sigui traha y tuma desicion. Esey a sosode diabierna atrobe. MEP no a bin trabao y e fraccion di AVP a dicidi di laga tur pregunta riba e ley di "parkeermeters" pa e reunion publico. Despues di e reunion e fraccion di MEP a protesta y bisa cu no a tene cuenta cu nan. E realidad ta cu nan no ta presenta pa trabao pero si kier pa tene cuenta cu nan. E didos protesta serca sr. Gobernador ta otro caso di un MEP cu ta purba tapa nan fayo di no bay trabou y tira culpa riba AVP. No ta prome biaha cu MEP ta haci esaki. Tanten cu nan scohe pa no bay trabao, nan tin cu realisa cu e fraccion di AVP si ta na trabou tur dia, manera mester ta y ta sigui tuma desicion pa hiba nos pais dilanti.

Expresionnan haci den e articulo aki no necesariamente ta refleha opinion di ArenaPoliti.co