Premier Rutte masha positivo cu oportunidadnan cu relacionnan den Reino ta brinda. 

ORANJESTAD/DEN HAAG- Minister President Mike Eman y su colega Juan David Yrausquin a subi e trapinan di 'Het Torentje' unda Premier Rutte tin su oficina pa reuni cu ne riba varios topico cu ta regarda Aruba y e relacionnan den Reino. Rutte a bisa na final di e reunion cu e encuentro tabata uno bon. "Mike y ami ta colega pa hopi tempo caba. Mi tin un aprecio grandi pa e forma con na Aruba e semper sa di dirigi e asuntonan den bon direccion. Ta pesey mes tambe cu mi ta dese'e tur clase di exito den e eleccionnan na luna di september na Aruba". 

Premier Rutte a splica cu awor cu na Hulanda eleccionnan ta tras di lomba, nan ta den e fase unda ta sondea posibilidadnan di un coalision. Ainda no a tene ningun reunion cu contenido entre partidonan. "Pero, mi ta sigur cu ora esakinan cuminsa, cu e relacionnan den Reino ta forma un parti esencial di e reunionnan aki. Mike y ami ta di opinion cu nos mester amplia e relacionnan, cu nos mester papia con nos por traha hunto riba cambio di clima, transicion di energia y con hunto nos por usa y uni e forsa innovativo di Hulanda, pero tambe di e partinan Caribense di Reino. Aruba ta cana dilanti, TNO a establece su mes eynan y Mike a organisa algun tremendo conferencia." 

Pa Rutte e relacionnan den Reino ta importante pa e historia unico cu e partinan ta comparti cu otro. "Pa por pensa cu un economia mediano/grandi den Europa Occidental tin un relacion asina fuerte cu e region Caribense ta algo apart. Historia a trece nos hunto y e relacion ta trece cu ne oportunidadnan unico. Hulanda como portal na Europa pa e islanan di Caribe y di otro banda e islanan por fungi como un brug entre Hulanda y Central y Latino America. Asina ta cu di ambos banda e posibilidadnan ta enorme."

Expresionnan haci den e articulo aki no necesariamente ta refleha opinion di ArenaPoliti.co