Na ocasion di e celebaracion di dia di Himno y Bandera, UPP  a mustra riba e hecho cu e aña aki, esta 2017, ta un aña cu nos ta recorda cu 40 aña pasa Aruba a tuma lugar un referendum riba 25 di maart, mientras cu na augustus lo ta recorda tambe 40 aña di e accionnan, yama tambe “Augustus Scur”. 

Dos acontecimento cu sigur a hiba na un serie di deliberacionnan tanto na nivel di Reino, di islanan Antiyano y localmente, pa al final logra e deseo tan anhela di Status Aparte pa Aruba. 

UPP a mustra den su articulo ey, y ta duna reconocimento na e comision cu ta purba pa concientisa nos pueblo riba e importancia di e referendum, cu apesar cu di tur forma ta purba na laga e parti di historia aki bay den olvido, ta necesario mustra riba e instrumento importante aki, cu a produci un cifra di mas di 80% di esnan cu a bay vota y cu ningun momento y ningun caminda ta haya su reconocimento. 

1977 sigur tabata un aña crucial den historia politico di e pueblo di Aruba. No unicamente a expresa su mes den un referendum pa su libertad, sino a subi caya na augustus 1977, pa pone Hulanda realisa cu Aruba tabata serio den su anhelo. Aruba a haya oido ora na september Conseho Insular di Aruba, hunto cu gremionan, a wordo ricibi na Den Haag. Y di e momento ey e bala a cuminsa lora cu a bin un cantidad di comisionnan na nivel di Reino y na nivel Antiyano, sin lubida esnan local, bou di un R.C.O.A. (Raadscommissie Onafhankelijkheid Aruba).

Prome cu e periodo aki Hulanda ainda no tabata tuma Aruba na serio. Y te na e momentonan ey, esta 1976/1977, Hulanda su punto di bista riba su teritorio ultramar den Caribe tabata un independencia pa tur 6 isla hunto. Esaki ta e punto cu a wordo poni na consulta cu pueblo, esta si e pueblo di Aruba kier keda pertenece den un teritorio di un Estado Federal di Antiyas of ta scohe pa su independencia. Manera Betico Croes e.f.m. semper tabata bisa, cu si ta independencia di Antiyas ta e deseo di Hulanda, anto Aruba ta scohe pa bira independiente un minuut prome cu Antiyas bira independiente.

Apesar cu tabata tin intentonan pa stroba e referendum aki, tanto localmente como na nivel di gobierno di Antiyas, Aruba a mustra di ta e prome pais den Reino cu a expresa su mes riba un tema hopi importante asina. Hulanda a mustra di no ta reconoce e referendum, dor cu esaki no tabata tin ningun base legal, ni di Constitucion, ni den Statuut, ni den Eilandenregeling Nederlandse Antillen. Mientras añanan despues nos por mira con na Antiyas diferente ocasion a tene referendum, mescos cu na Hulanda awor “referendum” ta un instrumento reconoci den ley.

UPP ya caba for di 2013, den su programa di partido, a bin ta boga pa nos como pais tambe bay reconoce de ley e instituto “referendum” como un forma pa consulta cu pueblo riba topiconan hopi importante pa pais. Nos por a mira con aña pasa, durante e famoso amienda nr. 7, varios ta e parlamentarionan di tur 3 partido representa den parlamento, a vocifera cu esaki lo ta un decision cu mester wordo tuma dor di pueblo den referendum. Pero nos por mira, cu hustamente dor cu no tin un ley di referendum, esaki a keda na papiamento so dor di e representantenan di pueblo aki.

UPP ta convenci cu “referendum” mester bira un forma real pa consulta pueblo riba hopi otro topiconan. Mescos tambe ta e “Dialogo Nacional” a la modelo di un R.C.O.A. Y no laga pa cada 4 aña so ta duna e pueblo oportunidad pa wordo consulta.


Partido UPP
Booshi Wever
24 di maart 2017

Expresionnan haci den e articulo aki no necesariamente ta refleha opinion di ArenaPoliti.co