8 di Maart ta un dia Internacional di Hende Muhe. E ta un dia cu a wordo fiha y reconoci mundialmente pa e ser femenino luchado. E ser femenino ta y ta keda e figura mas importante den bida como mama, como pareha, den trabou y henter e comunidad. E ser femenino semper ta keda stabil den tur su decision cu e tuma y mayoria biaha ta e decision correcto. E muhe tin un instinto cu niun otro tin. Por skucha di muhenan cu ta wordo maltrata domestico y toch nan a keda lucha pa su famia, muhenan cu a logra un meta of proposito den nan area laboral apesar di tur obstaculo of simplemente muhenan cu a destaca of haci un diferencia den otro su bida. Tur e muhenan aki, den un of otro sentido a haci un diferencia den nan propio bida of den esun di otro. Na tur e hende muhe nan aki, Pabien riba nos dia.

Mescos cu rond mundo ta duna e palabra di elogio na tur e ser femenino, aki na Aruba mes nos tin muhenan balente y exitoso cu ami kier a duna algun palabra di elogio. Mi por menciona sierto di nan: por ehempel sra. Mamona, un partera y curandera cu a bai laga nos pero a pone hopi bida riba mundo y tambe hopi ta esnan tambe cu ela cura di enfermedadnan cu su remedi di tera, sra. Margo Croes, un cabesante di Huishoudschool y despues a drenta arena politica y a fungi como deputado di Enseñansa y cu a haci hopi trabownan pa scol por sigi mantene su calidad halto, sra. Joyce Pereira, prome docente hulandes y prome papiamentologo acredita otro docente su a stimuli y a kere den nos dushi idioma papiamento, sra. Jane Semeleer, prome muhe cu a fungi como directora di Banco Centraal. Y asina nos por menciona mas yiu di tera cu simplemente tabata y ta un figura importante pero cu tambe ta figuranan cu den hopi aspecto di bida no a duna chens pa cai na caminda pero cu semper a lucha pa loke e meta ta. Danki p’asina ta e pilarnan cu nos por siña di boso.

Rond di mundo tin varios ser femenino cu posicionan clave, activista, muhe cu ta vocero pa diferente organizacion y te asta varios pais tin entre otro prome Minister/President of parlamentario cu ta bringa pa mehoracion di e pais. Aruba no a keda atras y nos tambe tin varios parlamentario femenino den parlamento. Asta nos pais ruman cu ta Curacao y Sint Maarten a jega di conose no uno ni dos pero cuatro prome Minister femenino cu a haci hopi diferencia den nan mandato. Mirando e situacion na Aruba nos mester di duna e beneficio di duda pa un ser femenino goberna y di tal forma pone e balance financier bek. Door di e stabilidad y multifuncional cu nos ta posee a wordo prueba cu e ser femenino ta e miho persona pa drecha situacion financiero of di economia di cualkier pais, organizacion of su propio hogar. E generacion nobo por sinja hopi di e figuranan aki su trabou, dedicacion y perseverancia y por ta un ehempel pa e otro generacion.

Como e ser debil fisico nos no mester laga nada of niun hende bisa cu nos no por of cu nos no ta capabel.  Cada uno di nos muhe tin e mama di naturalesa den nos pa distingui e inteligencia, e bondad, e seriedad y te asta e parti spiritualidad den nos. Cu e qualidades y aspecto nan aki, nos ta e ser mas prestigioso cu nos tata celestial a traha.

P’esey  nos hende  Muhe mester ta orguyoso di ta “Muhe”.

Expresionnan haci den e articulo aki no necesariamente ta refleha opinion di ArenaPoliti.co