Parlamento completo ta manda un mensahe serio pa tur instancia.

"Tin diferente les cu mester saca di e consecuencianan negativo di e forma di cumpra e Heavy Fluel Oil pa WEBnv (Hedging). E prome ta cu esnan envolvi den maneho di e compania mester por tuma iniciativa, pero semper informa tur concerni completamente y na tempo. Na didos luga, nan mester actua y informa mes ora algo cuminsa duna señal di bay malo. Na ditres lugar, mester tin un sistema interno den e compania pa evalua y corrigi desicionnan cu a tuma y cu por tin consecuencianan negativo. Esaki ta nifica cu esnan cu ta dirigi e companianan manera WEBnv, SETARnv, ELMARnv, SERLIMAR sg, APAnv, AAAnv y otronan cu ta traha bou encargo di gobierno of cu ta traha  cu placa di pueblo, mester duna informacion completo y na tempo na esnan finalmente responsabel (= Conseho di Minister y Parlamento) y nan mester responsabilisa nan mes pa nan desicionnan den e companianan." Rene Herde' lider di e fraccion di AVP ta preocupa pa esaki. E ta ripara un resistencia den e companianan y den departamentonan di gobierno pa duna informacion y pa responsabilisa nan mes. E echo cu tin un minister cu pa ley tin cu duna cuenta na Parlamento, no kier men cu hefenan di compania y departamentonan mes no tin cu duna cuenta of cu nan no tin cu responsabilisa pa desicionnan cu nan tuma. Cu e meta pa mehora e comunicacion y fluho di informacion entre directornan di companianan, departamentonan y oficinanan di gobierno y nan ministernan, y pa mehora e responsabilisacion di tur hende na tur nivel di sector publico, e fraccion di AVP a presenta un mocion cu a haya sosten di henter Parlamento.


INDEPENDENCIA
E mocion no ta mishi cu e caracter independiente di e companianan estatal. Rene Herde': "E intencion no ta pa cambia e status di e companianan aki. Nan a bira independiente netamente pa motibonan financiero y pa tene politica (partidista) pafo. Pero nan no ta companianan  priva. E responsabilidad (politico) final ta keda serca gobierno y Parlamento. Esaki kier men cu nan mester keda cu e espacio pa funciona como companianan independiente, pero mescos cu un compania priva mester duna cuenta na su doñonan, nan mester duna cuenta continuamente y debidamente na gobierno y Parlamento."

FUNDACIONNAN
Den e mocion cu a haya aprobacion di tur partido den Parlamento, tambe ta haci mencion di e necesidad pa responsabilisacion di fundacionnan. Segun Rene Herde', e principio ta cu si bo ta traha pa gobierno, cu propiedad publico of si bo ta traha cu placa di pueblo, bo mester responsabilisa na pueblo, pa e placa cu bo a haya pa haci un tarea pa pueblo. Pesey fundacionnan cu tambe ta traha cu placa di pueblo mester responsabilisa miho. E cuentanan anual segun Rene Herde' no ta suficiente mas.

Expresionnan haci den e articulo aki no necesariamente ta refleha opinion di ArenaPoliti.co