E biahe pa Hulanda di delegacion di Aruba a resulta fructifero 

ORANJESTAD - Prome Minister Eman durante e conferencia di prensa semanal a splica con henter e procedura encuanto un posibel reapertura di e refineria ta cana. Ora Minister de Meza a wordo acerca pa un compania interesa den compra di e refineria, Conseho di Minister a dicidi pa cana un proceso pa na prome luga envolvi e partnernan ‘green’ di Aruba y Reino. “Esaki pa e decisionnan cu mester bay tuma den e siguiente lunanan. Pa medio di ‘conference call’ a reuni cu ‘Carbon War Room’ y ‘Rocky Mountain Institute’ y a discuti cu nan riba e oportunidadnan y posibilidadnan cu tin. A discuti si un reapertura por ta conflictivo pa e desaroyonan berde cu gobierno kier pa Aruba.” E partnernan aki a conseha gobierno pa sigui cu e proceso, pasobra no mester descarta e formanan cu tin pa por laga un refineria funciona teniendo cuenta cu medio ambiente.

Eman a enfatisa cu mescos a scucha e partnernan ‘green’ a envolvi tambe e partnernan den Reino. “Esey ta e motibo cu siman pasa nos tabata na Hulanda unda a hiba combersacion cu Ministernan Koenders, Plasterk y Premier Rutte. Cu tur tres minister a trata e ultimo desaroyonan riba e tema aki.” E delegacion di Aruba a papia ampliamente cu e ministernan riba e pilar economico nobo basa riba sostenibilidad, riba e concepto di gateway, riba e industria turistico cu ta desaroyando den area di San Nicolas y pariba di brug y con por combina esaki cu presencia di un refineria. Tur tres minister Hulandes a reacciona positivo y constructivo. Nan ta compronde e impacto economico cu un reapertura lo tin y Hulanda ta dispuesto pa pone expertonan disponibel pa hunto cu expertonan di Aruba cana e proceso - parti den diferente fase - pa yega na un decision. “E fase di e proceso por ta si e desaroyonan por bay den un forma bastante ekilibra cu resultadonan win-win pa Aruba, e ora nos lo firma un MoU cu e compania.” Prome Minister e splica cu durante e periodo aki cu ta mas o menos te final di aña e compania ta haya tempo pa studia e factibilidad di e refineria y Aruba lo haci di su banda e estudionan necesario.

Gobierno di Aruba ta satisfecho cu Hulanda a pone expertonan disponibel, pasobra tanto riba tereno di relacionnan exterior, como tambe riba tereno di medio ambiente tin hopi cambio den mundo. Hulanda y Europa sigur hopi bes ta cana dilanti riba temanan aki. E delegacion di Aruba no solamente a haya oportunidad amplio pa papia cu e tres ministernan y  scucha nan consehonan, pero mes momento tambe e delegacion a haya oportunidad pa papia cu institutonan importante. Eman a splica: “Un di nan ya caba tabata traha cu Aruba, pero despues di ciere di e refineria no a sigui den e magnitud cu nos tabata kier, cu ta GasUnie. GasUnie tabata hopi leu den preparacion pa trece LNG (Liquid Natural Gas) Aruba pa asina e refineria lo no a draai riba e fuel convencional, pero lo a draai riba LNG cu ta un proceso hopi mas limpi, eficiente y menos costoso cu e fuel convencional.” GasUnie ta dispuesto pa bin bek Aruba pa bay den un partnership cu un otro desaroyador di e refineria. Asina un industria Hulandes di reputacion internacional tambe lo ta envolvi den henter e proceso. Banda di GasUnie e delegacion a papia cu un otro instituto cu ta trahando den 4 gemeente na Hulanda y awor tambe riba ‘waddeneilanden’. Nan ta cultiva ‘algen’ cu tin un balor grandi door cu nan por wordo desaroya den bio-fuel, pero tambe pa criadero di pisca y agricultura. E proceso aki ta haci uzo di e gasnan cu e refineria ta saca pa alimenta e algennan. E compania tin hopi experiencia den e cultivo y aplicacion practico di e tecnologia aki. E biaha a resulta fructifero y positivo.

Expresionnan haci den e articulo aki no necesariamente ta refleha opinion di ArenaPoliti.co