“Na final ta Aruba ta tuma e decision”, Eman a enfatisa 

ORANJESTAD - Despues di su yegada di Hulanda unda Eman y su delegacion a reuni cu diferente minister y otro institutonan pa loke ta un posibel reapertura di e refineria, Prome Minister a duna un splicacion amplio na prensa. Reapertura di e refineria ta algo cu mester bay cu hopi cautela. Asina a institui un comision mixto di expertonan di Hulanda y Aruba pa studia tur posibilidad y duna gobierno un conseho pa firma un MoU  pa despues revisa e aspectonan economico di e compania pa dicidi si un reapertura ta factibel. Den pasado hopi compania a bin Aruba, a mustra interes y na momento cu nan a haci estudionan di factibilidad, nan a haya cu no tabatin motivacion pa sigui.

E biaha aki ta trata di un famia di empresa cu conoce e refineria. Eman: “E hecho cu nan a mustra interes ta inspira confiansa. Nan sa mas cu e otronan cu den pasado a mustra interes. Nan sa kico ta  e potencial y capacidad y unda e refineria ta ‘fit’ den e structura di nan necesidadnan. Pa nos ta importante pa henter e proceso ta wordo haci den un forma huicioso, responsabel y cu nada ta wordo haci sin tuma tur efecto na consideracion. E refineria tin un potencial hopi grandi y den e dimensionnan cu nos ta purba di crea rond di dje lo tin un aspecto win-win si e ta factibel y posibel.”

Eman a enfatisa di ta contento cu e sosten cu su gobierno ta hayando di instancianan gubernamental y no-gubernamental na Hulanda y pafo di Reino cu cual Aruba a forma aliansanan fuerte. “Cu e sosten aki den e proceso nos por tuma e miho decisionnan y dirigi e desaroyo aki tambe den un direccion positivo. Pa gobierno ta importante pa e periodo di estudio ta uno rapido. Nos ta purba pa prome cu fin di aña e decision por wordo tuma. Sea cu nos tin un partner pa por bay den e direccion y cu e dimensionnan ya menciona – ‘berde’ y mas partner cu por haci’e uno nobo -  of si yega na e decision cu esaki no ta posibel. Di biaha ya na januari nos por cana e otro caminda cu tambe ta trece trabou y tambe ta trece desaroyo. Awor nos ta canando e caminda corecto pa sigura cu e refineria aki tambe ta cumpli cu  tur e normanan internacional di medio ambiente caminda cu nos ta percura pa loke ta conta den tratadonan internacional. Pa Union Europeo y Reino Hulandes ta importante cu tin expertonan Hulandes na bo banda.” Eman kier a splica bon cla si cu ningun momento Aruba ta laga gobierno Hulandes dicidi kico su gobierno mester haci. “Si nos kier pa e ta un decision mutuo cu tur e experticio necesario pasobra cu aki tin diferente faceta cu ta pidi pa un acercamento mucho mas amplio cu si nos mes dicidi sin tuma na consideracion e aspectonan internacional cu ta di fundamental importancia pa e stabilidad y bon nomber di Aruba. Mi no ta kere cu por tin hende cu tin algo contra pa gobierno cana e caminda mas huicioso y responsabel posibel. Nos no ta mira pakico tin hende ta reacciona negativo den envolvi gobierno di Reino y su expertonan pa cana cu nos durante e proceso aki. “

Expresionnan haci den e articulo aki no necesariamente ta refleha opinion di ArenaPoliti.co