Den Haag –  Hulanda pa algun tempo caba a tuma diferente medida pa tur persona cu ta desea di biba akinan. Esaki ta conta pa Arubianonan tambe, maske cu nan tin nacionalidad y pasaporte Hulandes. E maneho di gobierno Hulandes, tanto central como municipal, ariba e leynan social a bira hopi stringente. Ta bin aserca cu for di comienso di 2015 a wordo introduci e participatiewet cu tambe a bira un problema pa tur Arubinao cu ta pensa di bin biba na Hulanda y ta pensa di solicita pa ayudo social financiero (uitkering). Simplemente nan no ta bin na remarca mas pa un uitkering.

Pa e motibo aki Nuris Dabian, coordinadora di asuntonan social y cultural na Gabinete di Aruba na Hulanda, ta efrentando hopi problema social di Arubianonan cu a bin fin di aña pasa. Empleadonan di gemeente tabata sa cu desde januari 2015 hopi cambio lo bini y e cambionan aki ta nifica cu e responsabilidad a bira di e gemeente. Pesey nan a hasi dificil pa Arubiandonan no haya chens di inscribi nan mes den nan gemeente.

Sra. Dabian kier splica cu Hulanda no ta e Hulanda di antes, unda un persona por bin na remarca pa un bon cuido social y seguro di bida (zorgstelsel). Antes ora un persona bin biba Hulanda ta un adres e mester tabata tin pa e por inscribi su mes na un gemeente. Un cambio significante ta pa un persona bibando na Hulanda cu ta ricibi un uitkering. Na e momento cu un otro persona inscribi su mes na gemeente bou di e adres di e persona  aki, e entrada mensual di dje (su uitkering) ta bira menos. Esey a trece cu ne, cu aunke tin hopi Arubiano na Hulanda cu kier yuda un paisano, e no por ricibié na cas. E persona por aloha cerca dje, pero e no por inscribi su mes na gemeente bou di e adres ey. Consecuentemente e persona cu no inscribi na gemeente casi no tin ningun derecho y entre otro nan no ta haya uitkering pa nan mes.
Esnan cu ta bin Hulanda pa cuido medico door di AZV no tin problema, manera mescos ta e caso cu studiantenan di HAVO,VWO cu ta bin pa sigi studia.

‘nieuwkomers’

Actualmente tambe ta asina, cu esnan cu ta bin Hulanda bou di nan propio responsabilidad pa purba haya cuido medico of problema cu nan yui cu no por wordo yuda na Aruba, of studiante di MBO no por bin na remarca sin mas pa wordo inscribi, haya uitkering of studielenening. E leynan actual a hasi cu pa e grupo di ‘nieuwkomers’ a bira masha dificil, of casi imposibel pa regla nan asuntonan. Un ehempel: tin caso cu te ainda señora Dabian ta tratando conhuntamente cu diferente fundacionnan (organanizacion pa nos hendenan den Caribe) pa yuda un mama soltera cu dos yui pa e por establece su mes na Hulanda pa cuido medico. Segun e cliënte su specialista na Aruba a consehe pa bai Hulanda, ya cu na Aruba nan no por hasi nada mas pe. Despues di 7 luna te ainda e no por yega na haya un uitkering. Actualmente e ta inscribi caba bou di un adres, unda antes e lo por a bin na remarca pa un uitkering. Pero toch bou di e leynan nobo e no ta bin na remarca door cu e doño di e cas ta gana un tiki mas cu un salario minimo. Ariba dje ley ta exigi cu un persona cu ta inscribi mester ta segura pa cuido medico. E persona ta cuminsa aumenta un debe sin tin entrada. Si e NO ta segura e persona ta haya un boet tambe. Si nos por hasi un inventarisacion di e ley y reglanan ta manera e porta a wordo cera!

Otro medidanan cu a bin aserca ta cu na e momento cu un persona tin un hende inscirbi bou di su adres e lo haya un sorpresa fin di aña cu belasting. E mester paga extra belasting. E suma ta varia, ya cu esaki ta segun e gemeente unda cu bo ta biba. E minimo ta un suma di 300 euro. Tambe pa cada persona cu ta biba den cas mester paga por ehempel mas riool belasting.

‘financiële binding’

Pa bin na remarca pa un cas awor ta exigi cu bo tin un ‘financiële binding’ cu e ciudad, cu otro palabra Bo mester tin un trabou na e ciudad ey of na otro parti di Hulanda. Esey caba ta hasi cu un ‘nieuwkomer’ cu no tin entrada no por bin na remarca pa un vivienda social te despues di dos aña. Pero door cu Bo no tin entrada y sin adres Bo no por yega na un cas tampoco. Porta a cera aki tambe. Admas señora Dabian ta agrega tambe cu e la topa cu hopi caso di discriminacion, principalmente ora cu un persoan yega na bali pa wordo yuda.

Tambe e la wordo confronta cu ora famia of conocirnan realisa cu nan lo haya problema cu gemeente nan ta saca e personannan for di cas cu consecuencia cu nan ta ariba caya.
Antes como Gabinete di Aruba nos por a yama opvangcentrum directo, pero awor e procedura ta cu mester acudi na un Centraal Coördinatiepunt (CCP) pa meld cu bo ta sin cas (dakloos), pero eynan tambe tin un porta cu a cera. Na e momento cu nan puntra e persona ariba cual adres e tabata biba anteriomente y nan wordo informa cu nan a caba di yega Hulanda, nan ta haya como contesta cu nan tin cu bai cas bek, ya cu bo mester tabata biba den e ciudad pa wordo yuda. Esaki a trece como concecuencia cu hopi di nos Arubianonan mester a biba aki aya cerca amigo temporalmente of hasta pasa anochinan den un station di trein te ora cu famia yuda nan bai cas bek.
Gabinete di Aruba ta conciente cu tin Arubianonan cu ta desea di establece nan mes na Hulanda. Pesey cu e informacion duna, Gabinete di Aruba ta purba na informa nos hendenan cu e situacion a cambia na Hulanda. Tene bon cuenta cu esaki, prome cu Bo tuma e paso pa bin Hulanda. Pa cualkier informacion adicional libremente por dirigi un email na señora Dabian ariba email: This email address is being protected from spambots. You need JavaScript enabled to view it..

Expresionnan haci den e articulo aki no necesariamente ta refleha opinion di ArenaPoliti.co