Den Haag – Un cantidad grandi di compania a registra pa atende e Green Aruba Pre-event cu lo tuma lugar dia 30 di september proximo den Kyocera stadion na Den Haag. Faltando un par di dia, por bisa cu e meta pa cu e cantidad di registracion a keda surpasa. Esaki ta mustra e interes grandi cu ta existi bou di companianan Hulandes pa e vision sostenibel di Gobierno di Aruba.

Pa simannan caba un team tanto na Aruba como na Gabinete di Aruba na Den Haag a bai ta trahando estrechamente cu otro pa haci e evento aki un exito. E pre-event tin como meta pa entusiasma e companianan pa bai Aruba pa participa na e di seis edicion di Green Aruba Conference na fin di october.

E programa di e pre-event lo consisti di un presentacion di Minister Plenipotenciario Alfonso Boekhoudt riba a situacion actual pa loke ta proyectonan sostenibel y di infrastructura na Aruba. Minister di Asuntonan Economico, Comunicacion, Energia y Medio Ambiente Mike de Meza lo concentra den su discurso riba e pasonan concreto cu Aruba ta tumando pa e isla ta draai 100 porciento riba energia sostenibel na 2020. Director di Utilities Aruba Frank Hoevertsz lo bai mas den detaye durante di su presentacion ariba e aspectonan technico di e diferente fuentenan di energia duradero.

Un ehempel di un proyecto concreto ariba tereno di energia duradero ta e solar park na Aeropuerto Reina Beatrix. CEO di e compania Pfixx Solar Fons van Pul lo duna un presentacion riba nan proyecto na Aruba y tocante e facilidadnan cu Aruba ta brinda na companianan pa inverti riba tereno di energia duradero y desaroyonan inovativo. Den e mesun liñea aki Mart van Bracht, director di Energia di TNO lo papia riba e experencia di TNO, cu nan establicimento na Aruba y nan contactonan via di Aruba cu paisnan den Caribe y Latino America.

Expresionnan haci den e articulo aki no necesariamente ta refleha opinion di ArenaPoliti.co