STUDIANTENAN DI IPA A BISHITA PARLAMENTO DEN CUADRO DI SOSTENEBILIDAD. 

ORANJESTAD -- Studiantenan di tercer anja di IPA hunto cu nan docentenan a bishita Parlamento diamars ultimo. Tabata tin varios parlamentario presente di MEP y AVP.
Pa MEP a hiba palabra lider di MEP Evelyn Wever-Croes y parlamentarionan Dangui Oduber y Guilfred Besaril. E bishita tabata den cuadro di e workshopnan cu e studiantenan a sigi di SOSTENEBILIDAD, y IPA ta aplica e cuatro "P" den esaki: People, Profit, Planet y Participation. Lider di MEP Evelyn Wever-Croes a splica ampliamente con partido MEP ta mira sostenebilidad.
"Pa partido MEP e terminologia sostenebilidad no ta limita solamente na medio ambiente, manera Gobierno di Aruba ta pensa. Pa nos e ta basa riba 3 pilar:

E prome pilar ta e bienestar di bo hendenan, percura pa por cumpli cu e necesidadnan basico, combati pobresa, ofrese bon calidad di ensenjansa, y bon cuido di salud. Si un pais no por percura pa esaki, e no por wordo considera sostenibel.
E di dos pilar ta e situacion financiero y economico di bo pais. Un debe cu a redobla den ultimo 6 anjanan ta pone cu Aruba awor ta paga 200 miyon florin na interes pa anja. Debi cu nos situacion financiero ta asina malo nos mester paga interes na 6%. Nos por haya fiansa na 1% interes, pero e condicion ta cu nos finansas mester ta na orden. Tanten un pais no tin su finansas na orden, e no por wordo considera sostenibel.
E di tres pilar ta medio ambiente, y den vision di MEP, nos mester bin cu un ley di medio ambiente pa regula y controla tur e decisionnan relaciona cu medio ambiente, y protehe nos medio ambiente.
Studiantenan di IPA ta aplica un di cuatro pilar, cu ta participacion, cual den vision di partido MEP tambe ta uno hopi importante, pasobra e problemanan di nos pais ta serio, sinembargo e solucionnan no ta dificil, si bo tin un vision, determinacion, y si nan ta wordo carga ampliamente. Y pa haya un base amplio pa carga e decisionnan cu mester wordo tuma, participacion ta e yabi" lider di MEP a duna di conose.

E studiantenan tabata tin varios pregunta bastante critico, mayoria relaciona cu ensenjansa duradero, y e maneho di gobierno al respecto. Apesar cu e informacion aki lo mester a bin for di gobierno mes, Parlamento a trata mas tanto posibel di duna informacion al respecto. 

"E studiantenan tabata critico, y esey ta dunami speransa cu nos ta bai sigi haya docentenan critico y bon prepara. Mi a conseha nan tambe pa nan sigi ta critico, sigi vocifera nan opinion, pasobra ta solamente di e forma ey nos por haya e cambionan den ensenjansa cu ta eleva e calidad", segun lider di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co