Nos fraccion ta siguendo e desaroyonan di nos turismo hopi di serca y ta sumanente prepocupa cu esaki. Na momento cu hotelnan ta mirando cu pa 8 luna consecutivo grado di occupacion ta cai, REV PAR ta cai ta senjalnan cu nos turismo ta den crisis y ta debilatando. For di 2 anja pasa nos fraccion a adverti minister di tursimo cu tin cierto desaroyonan nobo den nos turismo cu ta preocupa nos y cu no por wordo considera como un turismo solido y duradero. E minister di turismo a ignora tur e senjalnan aki y a keda broma cu cantidad di turista locual den realidad no tawata turistanan berdadero. Awe e mes ta haye confronta cu e problema aki. Tur hende na Aruba por a nota e e crecemento explosivo di turistanan Venezolano for di anja 2013. Na lugar cu Otmar Oduber actua y busca manera di diversifica nos turismo a scohe pa bai hunga cu e cifranan cu a cumbinie na e momentonan ey. Nos tur por corda con anja 2014 a sera cu mas cu 1 miyon turista y cuanto credito e tawata duna su mes sabiendo cu e crecememto e tempo ey tawata un crecemento ficiticio pasobra si e cantidad di Venezolanonan (cu no por wordo considera turista) NO a subi di e manera ey nunca lo a yega 1 miyon turista.

E anja aki 2016 a habri sumamente malo pa nos turismo. Den pleno high season, locual mester ta un di e mihor lunanan di anja nos pais a sufri un caida for di nos promer Mercado cual ta e Mercado mericano. E Mercado mericano a cai cu 3%. No solamente e mercado aki a sufri un caida pero e mercado di Brazil a cai cu 43%. Canada ta cai cu 8.6% y e mercado Hulandes a cai cu 12.2%. Un biaha mes e mercado cu Otmar Oduber ta contando riba dje ta esun Venezolano cu si a crece. Danki na e Mercado aki e minister por papia di crecemento di stayoversnan.

E ta obvio y bisto cu nos turismo ta den problema hopi serio. Na momento cu hotelnan cuminsa perde placa e forza laboral ta corre peliger. Hotelnan ta e dunador di trabou mas grandi na Aruba y esey ta e preocupacion mas grandi cu nos tin. Nos mester percura pa nos tin un turismo solido, nos mester percura pa nos hotelnan ta yen. Otmar Oduber awor ta busca yen di excusa pa saca su curpa siendo cu en realidad su maneho a faya. E la ignora e trend nobo den nos turismo, e la bai hunga cu cantidad envez di traha na diversifica e Mercado turistico y purba atrae otro tipo di turistanan cu si lo gasta hopi placa den nos economia y cu si lo hospeda na hotelnan.

Si Otmar Oduber tawata tin un masterplan traha nos NO lo ta pasando den e momentonan aki. Un minister cu vision NO ta traha AD HOC sino mas bien tin un masterplan pa e proximo 10-15 anja. Den e caso di Otmar Oduber e ta laga e baca hoga pa por actua locual ta pasando cu nos turismo den e momentonan aki.

Si Otmar no por haci e trabou e ora e mester entrega su retiro dia 1 di maart manera e tawata tin intencion di haci y laga otro haci e trabou!

Expresionnan haci den e articulo aki no necesariamente ta refleha opinion di ArenaPoliti.co