Awe ta un dia hopi tristo pa partido MEP caminda nos ta bay hiba sr. Luis Rey Giel pa su ultimo lugar di sosiego. Luis tabata co-fundador di MEP tempo cu nos Libertador Betico Croes a funda nos partido na 1971.  Danki na su entusiasmo y determinacion Luis a gana e confiansa di nos lider inmortal y a wordo postula como candidato riba e prome lista di MEP pa e eleccion di Conseho Insular na 1971. Desde e tempo ey Luis a lucha incansablemente den fila di nos partido. Nos ta recorda Luis como un persona cu hunto cu su esposa Petra tabata asisti te na ultimo - te asina leu cu su salud ta permiti - na tur actividad di MEP y semper cu e entusiasmo cu ta caracterisa su persona.
Sin duda cu Luis Giel formando parti di partido MEP tambe tabata un di e baluartenan fiel cu a lucha hunto cu Betico Croes pa e logro di nos Status Aparte. Su lealtad incondicional na nos partido lo keda ser recorda pa semper.
Lider di partido, sra. Evelyn Wever-Croes den nomber di MEP ta desea sra. Petra, yiunan, nieto y bisanietonan y demas famia hopi forsa cu e perdida tan grandi aki y cu Luis Giel lo haya un bon lugar den Reino Celestial.
Alabes ta invita henter partido MEP pa asisti na e acto di entiero cu lo tuma lugar awe diaranson 3 di augustus 2016. E difunto lo ta reposa desde 2’or di atardi den Misa Santa Anna na Noord.

Expresionnan haci den e articulo aki no necesariamente ta refleha opinion di ArenaPoliti.co