"Awor cu Aruba ta hayando sosten y reconocemento internacional pa su esfuersonan pa stimula uso di energia renovabel den forma concreto, oposicion ta realisa cu te awor nan a para na banda y grita so. Awor nan ta cuminsa realisa cu atrobe nan a scohe totalmente robez. Nan a scohe politica negativo y di corto plazo, enbez di contribui of sikiera no stroba un di e areanan di desaroyo mas importante pa cualkier pais awendia. Esta sigura nos pais energia continuo y pagabel den futuro"

SOSTEN Y RECONOCEMENTO
Ora AVP for di den oposicion a scohe con upa sigura nos hendenan y nos pais un miho calidad di bida pa hopi tempo den futuro, a scohe pa cambio y renobacion di nos pais. Masha lihe a yega na e conclusion cu mester sigura nos pais energia sostenibel y pagabel den futuro. E motibo ta cu energia (coriente) ta determina calidad di bida den tur pais y capacidad competitivo di tur economia. Una bez den gobierno y parlamento AVP a scohe duna hopi atencion na reduci e dependencia di petrolio como fuente di energia y scohe pa usa e fuentenan di energia cu nos tin na abundancia: solo, biento y awa. Esey no solamente ta reduci nos dependencia di petrolio y e prijs cu ta fluctua, pero tambe pa sigura un suministro continuo y mas pagabel den futuro tambe. Nos tabata conciente cu e proceso di concientisa pueblo, cambia e sistema di genera energia y implementa proyectonan concreto lo tuma hopi tempo, hopi esfuerso y hopi placa. Pero mescos cu den otro paisnan cu ta hopi mas avansa, e frutanan final pa nos pais lo ta hopi y importante den futuro. Un factor importante pa un pais chikito manera Aruba ta cu e cambio di energia basa riba petrolio, pa uno basa riba fuentenan renovabel, no por depende di gobierno so. Ni pa e esfuersonan cu mester haci, ni pa e financiamento. Ta pesey e sosten y reconocemento cu Aruba ta hayando internacional ta asina importante. E reconocemento y sosten den Reino. Manera di e instituto TNO. Tambe di organisacionnan internacional manera Carbon Warroom. E reconocemento y sosten publico di Secretario General di Nacionnan Uni, Ban Ki Moon y di ex-presidente Merca Bill Clinton siman pasa, ta ehempelnan concreto y importante pa e esfuersonan di Aruba. Pasobra ta asina ta stimula sosten di inversionistanan den e area di energia. Rene Herde:"Ta parse cu awor cu Aruba ta haya e reconocemento y sosten internacional, cu oposicion ta realisa cu nan ta mal para den e asunto aki. Nan critica infunda y descabeya te awor a wordo hala un banda cu un asombro y desaprobacion. Tanto local como internacional. Djis puntra hobennan riba e tema aki bo ta realisa con malo e posicion cu oposicion a tuma tabata."

INTERES DI PUEBLO
Riba e tema aki, mescos cu den tur otro tema, ta loke ta na interes di nos pais y nos hendenan ta conta pa AVP. E reconocemento y sosten ta sirbi pa stimula inversionistanan local y internacional. Na final ta Pueblo di Aruba lo ta esun cu lo beneficia di un suministro di energia den futuro cu ta sigur, cu no ta depende di otronan den exterior of di e fluctuacion di e prijs di petrolio. Stabilidad, seguridad di energia pagabel ta e meta final. Rene Herde': "E ta tuma hopi tempo, energia y fondo pa yega unda nos kier  yega. Pero enbez di djis soña didje, enbez di wak otronan haci'e den nan pais, enbez di critica cu e prijs di energia di petrolio ta halto, nos a tuma e prome pasonan y wak e resultado te awor. Nos a pone e fundeshi y un bon plan. Awor ta cuestion di atrae inversion y ehecuta."

Expresionnan haci den e articulo aki no necesariamente ta refleha opinion di ArenaPoliti.co