MEP A PRESENTA UN NOTA DI INTEGRIDAD DESDE MEI 2014 

Durante conferencia di prensa di MEP, lider di MEP Evelyn Wever-Croes a expresa su preocupacion pa tanto corrupcion den gobierno di AVP.
“Laga nos debati riba integridad, MEP ta bogando pa esaki pa mas di dos anja caba durante reunionnan tripartiet den Reino, pero cada biaha AVP ta haya atake di panico y kier stroba esaki. Den nos nota, cu nos a presenta na mei 2014, nos tin inclui un Codigo di Conducta pa minister y parlamentarionan, pero esaki tampoco parlamentarionan di AVP kier debati riba dje.
Mi ta reta tur parlamentario di AVP cu kier debati riba integridad, pa e debate aki. Ban debati riba e tema aki for once and for all y introdusi reglanan di integridad y codigo di conducta. E ora nos por discuti si ta aceptable, cu un minister ta pidi trato prteferencial pa haya tereno di su propio gobierno, si parlamentarionan por pidi y haya tereno y casnan di nan propio gobierno, si  un persona di cual su casa ta consehero di minister, por ta parlamentario. Si otro persona cu su casa ta abogado di un proyecto miyonario di gobierno, por ta parlamentario. Si otro persona cu tin un strafblad, cu a wordo acusa den ladronicia den pasado, por ta parlamentario. Si un persona cu a yega di dal hende mata cu auto, por ta parlamentario. Si un parlamentario por ta parlamentario y sigi opleiding di scol di polis parew.  Ban introdusi reglanan y despues ehecuta nan”, Lider di MEP a trese padilanti.

INTEGRIDAD DEN REINO
Sra. Wever-Croes a lamenta tambe cu nada ta wordo hasi riba e tema aki pa Aruba por hasi un bon papel den Reino, y probablemente esey ta e motibo cu AVP a saca su persona afo di e comision di Reino anja pasa. “Aki algun siman tin un otro reunion di IPKO na Hulanda, y atrobe Aruba mester pasa berguensa cu ta nos so no tin ley ni regla riba e tereno di integridad. Esaki ta refleha malo riba henter nos pais, djis pasobra un grupito kier tapa pa e corpucion cu ta pasa den gobierno na Aruba cu tin asina tanto conflicto di interes. Nos di MEP si tin tur nos documentonan prepara y bon documenta pa dia nos bai e reunion ey na Hulanda, pasobra nos nota ta cla desde mei 2014 caba”.

ESCANDALONAN DI MINISTERNAN DI AVP
“Dicon Gabinete Mike Eman tin asina tanto problema cu integridad? Nan no por screen e hendenan cu nan ta "wheel and deal" y "wine and dine" cu nan? Y evita di pone nomber di ARUBA cada biaha den lus negativo? Nos a tende di cantidad di caso dudoso den cual politiconan di AVP ta wheel and deal cu hendenan dudoso. ‎ Strawberry-gate, Lainda-gate, Kiko Gomez-gate, Bushiri-gate, RINCON-gate y awor TERENO-gate, y cuanto mas cu nos no sa di dje ainda
E problemanan serio di falta di integridad di e gobierno aki, no por wordo scondi mas, y pesey tur e escandalonan aki ta sali na lus di dia. Integridad por wordo salbaguardia sibo tin e leynan necesario, cual Aruba no tin y AVP no tin ningun intencion di pasa nan. Pero tambe si bo tin un ministerio publico cu ta controla y investiga e cosnan aki, cual tampoco ta pasa na Aruba. Y madre patria Hulanda ta bira cara y wak otro banda.
Integridad ta algo cu bo tin of bo no tin! Integridad ta ora bo ta hasi lo corecto, te hasta ora ningun hende ta wak. Pa nos di MEP integridad ta crucial den gobernacion, y pesey e tin un parti hopi importante den nos programa di campanja. Casonan manera Strawberry-gate, Lainda-gate, Kiko Gomez-gate, Bushiri-gate y awor RINCON-gate, tur a trese duda serio den integridad di gobernantenan di Aruba, no solamente serca nos, sino tambe serca politiconan den Reino.

Expresionnan haci den e articulo aki no necesariamente ta refleha opinion di ArenaPoliti.co