TA PARTI ESSENCIAL DI MANEHO PA SALI DI CRISIS CU MAP A BAY LAGA ARUBA ADEN 

"Na fin di aña pasa gobierno di AVP a tuma varios desicion pa mehora forsa di compra na Aruba. E efecto di e desicionnan aki ta mehora forsa di compra cu mas o menos 10% pa mas cu 60% di famianan den nos comunidad." Asina Rene Herde', lider di fraccion di AVP a declara den fin di siman.  E desicion di aumenta entradanan minimo for di dia 1 di maart awor y e bahamento di prijs di coriente hunto ta percura pa esey segun calculacionnan haci. A puntra Rene Herde' kico ta motibo cu gobierno ta bolbe tuma desicionnan pa mehora forsa di compra. Rene Herde': "E motibo ta cu nos ta wak mehoracion di forsa di compra como parti essencial di recuperacion for di e crisis y indispensabel pa adelanto real di pueblo. No adelanto den cifra y cu promesa, pero den forma cu pueblo ta sinti'e directamente y ta wak e den nan recibo di coriente y nan cartera." E desicionnan aki en berdad no ta e prome biaha cu ta tuma desicionnan cu ta toca forsa di compra. Den su maneho AVP a haci mehoracion di forsa di compra pa especialmente esnan cu entrada mas abou, un punto di lansa di su maneho financiero-economico. Den su maneho AVP a scohe pa saca nos pais di e crisis y pone crece atrobe door di stimula economia, stimula forsa di compra, inverti den renobacion fisico y social di nos pais. E escohencianan aki ta mustra cu e meta di un desaroyo balansa cu AVP a scohe pe, no ta djis palabranan bashi den un campaña politico. Al contrario. Nan ta mustra con AVP ta duna contenido na e meta di crece y bay dilanti, tur hunto!

CRISIS Y CRECE
AVP a bisa bez tras bez, cu e miho forma di sali di e crisis ta door di pone nos pais crece atrobe. No door di corta gasto den forma bruto tur caminda y den poco tempo, manera MEP sosteni pa Hulanda tabata kier. AVP no a kere den e maneho ey. Sigur no den e crisis cu MEP a laga Aruba  aden. AVP a haya hopi critica pa e maneho di pone nos economia crece prome, mehora forsa di compra prome y pa haci e reforma di finansa publico ora economia ta miho. Oposicion di MEP/PDR y Hulanda a yama e maneho aki irrealistico y malgastamento di placa. E realidad ta sinembargo cu riba tur aspecto di finansa, economia, labor y forsa di compra, AVP ta hayando rason awe cu hopi famia na Aruba a ripara e adelanto den nan forsa di compra. Esaki ta e maneho balansa cu AVP a scohe pe y cu a duna resultado pa Pueblo! No pa un grupito manera bou gobiernonan di MEP. Pero pa Pueblo mes!

Expresionnan haci den e articulo aki no necesariamente ta refleha opinion di ArenaPoliti.co