Durante training na Mangel Halto di Formacion Social

ORANJESTAD – Como parti di nan actividad escolar, hobennan di SPO (EPB) a wordo invita pa bishita e campamento di entrenamento di Grupo 8 y 9 di Formacion Social na Mangel Halto. Prome Minister Mike Eman tabata presente pa e ocasion special aki pa splica e.o. e inicio di e programa Formacion Social y e meta su tras. Mas cu 30 hoben compaña pa varios docente a yega Mangel Halto pa mira con e hobennan di Grupo 9 di Formacion Social a siña e disciplina militar, entre otro necesario ora di move den un rubberboot, loke ta exigi hopi concentracion.

Tur studiante por a mira e tipo di ehercicio cu ta wordo duna durante e sesion di training, durante e prome tres simanan di e programa, pero tambe loke e hobennan ta come ora cu nan ta den mondi, ki ora nan ta lanta y mucho mas. Tur loke ta nan rutina durante e casi un aña di duracion di e programa.

Prome Minister Eman na cada un di e tres postnan a splica e hobennan pakico a bini cu e programa aki specialmente pa hobennan, "ya cu di e forma aki nos kier saca un man pa yuda nan haya nan caminda den bida. Sea pa nan sigui cu nan estudio of drenta mercado laboral, pues loke nan ta desea”.

Esaki tabata di dos biaha cu Formacion Social ta duna presentacion na studiantenan di SPO. E hobennan cu finalisa e SPO-Opleiding ta haya un certificado, pero hopi biaha e chensnan den mercado laboral cu e certificado aki no ta grandi y nan por scoge pa sigui e trayecto di Formacion Social, cu ta duna nan mas formacion y disciplina y por haya un trabou mas lihe. Na momento cu nan finalisa SPO nan ta hopi jong ainda y participando den Formacion Social ta duna nan mas confiansa den nan mes. E aspecto mas importante di Formacion Social, esta disciplina, ta duna nan mas siguransa den e rumbo cu nan kier tuma.

E studiantenan tabatin varios pregunta pa militarnan y tambe pa Prome Minister Eman. Varios studiante femenino a expresa e deseo pa Gobierno habri e posibilidad pa nan tambe por participa. Pa haci esaki posibel, mester haci varios cambio, Jessy Ras, coordinador di e proyecto, a splica. Entre otro cambionan den hospedahe y introduccion di instructornan femenino pa guia mucha muhenan.

Formacion Social ta un programa cu a cuminsa na 2010 riba iniciativa di Prome Minister Mike Eman den cooperacion estrecho cu Ministerio di Defensa di Reino. Mientras tanto e programa ta financia pa pais Aruba den cooperacion cu Mariniers Kazerne Savaneta.

Expresionnan haci den e articulo aki no necesariamente ta refleha opinion di ArenaPoliti.co