Prome Minister Eman cerca hobennan di SVT na Mangel Halto 

Eman: Nos ta orguyoso di boso y cu Dios inspira boso 

ORANJESTAD – Gobierno por haci hopi, pero na final di cuenta e decision pa trece un cambio den bida, despues cu e instrumentonan wordo poni na nan disposicion, ta e mesun hobennan. Esaki ta loke Prome Minister Mike Eman a splica hobennan di Grupo 9 di Formacion Social, kendenan tabata cumpliendo cu un parti di nan ehercicio na e beach na Mangel Halto. E grupo aki a haya bishita tambe di mas cu 30 studiante di Scol Practico pa Ofishi (EPB) na momento cu Prome Minister Mike Eman a acudi eynan pa apoya e hobennan di SVT (Formacion Social). Di e forma aki e mandatario a haya chens pa hiba e mensahe na mas hoben riba e importancia di e programa di Formacion Social.  

E discurso di sosten di e mandatario dirigi na hobennan di SVT semper ta uno yena di positivismo, elogiando e hobennan pa e decision tuma, sea riba nan mesa of encurasha pa famia, cu ta permiti nan trece un cambio den nan bida. “Esaki ta un programa cu ta cambia boso bida, pero e trabou mas grandi ta den boso man. Ta boso mester dicidi si boso ta gara e oportunidad aki. E apoyo di e famia y amistad ta hunga un rol, pero esnan cu tin e determinacion mas grandi pa cumpli cu e reto aki den forma exitoso, ta logra. Na final, e trabou ta uno cu ta depende di boso determinacion. Nos t’aki pa duna boso e apoyo hunto cu e team di Formacion Social y Marinierskazerne,”e mandatario a bisa e hobennan.

Tambe e mandatario a duna un splicacion cu e programa aki na inicio tabatin e apoyo financiero di Ministerio di Defensa di Hulanda, pero Gabinete Mike Eman a mira e exito y importancia di Formacion Social pa cual a tuma e decision cu pais Aruba mes lo financia esaki completamente. “Cu ayudo di Marinieskazerne y Arumil, haciendo uzo di nan experticio,”e mandatario a splica.

Prome Minister a splica e hobennan di Grupo 9, con orguyoso e ta sinti su mes di cada un di e hobennan cu finalisa e trayecto di practicamente un aña den forma exitoso. Esaki pasobra na final, e hoben ta cla pa sigui cu su estudio y finalisa esaki, of tin e certificado di stage cu el a pasa aden, cu ta permiti'e drenta mercado laboral. E ta un sentimento grandi, e mandatario a bisa nan. “Mi ta sigur cu ora boso haya boso baret, den presencia di famia, cu boso lo sinti un alegria hopi grandi, pasobra boso a pone un meta y kisas pa e prome biaha den boso bida a keda persisti pa logra e meta ey. E ta duna un confiansa propio hopi grandi, cu ta hopi importante pa resto di boso bida.”

Mes importante cu e parti militar, e disciplina, ta e di dos parti di e trayecto cu ta e formacion educativo, cu por yuda e participantenan yega na un trabou, si nan dicidi di drenta e mercado laboral mesora. Pa e hobennan ta prepara pa esaki, ta laga nan participa den diferente curso y core stage na companianan local. Na final ta haya un certificado cu ta mustra tur e cursonan den cual nan a participa.

Sinembargo ora cu nan finalisa e trayecto no ta e fin real, e mandatario a splica. “Na final nos ta tene man cu boso, pa nos por haya boso riba e caminda cu boso a scoge. Tin hopi cu kier sigui nan estudio na final, despues di a pensa largo di loke kier den  bida. Pero tin otronan cu a gusta loke nan a siña y ta prefera cuminsa traha di biaha y nos ta yuda nan busca un trabou. Nos ta sigui cana cu boso te dia cu boso ta stabil. Esey ta e meta di nos programa,”Prome Minister a bisa e hobennan cu a sigui e discurso atentamente. El a agrega cu e ta consciente cu e decision cu nan a tuma no ta facil, pa laga celular y otro divercionnan un banda pa participa den Formacion Social. ‘Danki den nomber di Aruba, famia y amistadnan.” Formacion Social ta un programa cu a cuminsa na 2010 riba iniciativa di Prome Minister Mike Eman durante gobernacion di Gabinete Mike Eman I.

Expresionnan haci den e articulo aki no necesariamente ta refleha opinion di ArenaPoliti.co