Tin biaha ta bon pa duna Pueblo un splicacion riba acontesimento politico cu ta tuma lugar na nos Pais cu den primer bista no tur hende ta compronde di biaha, pero cu ta di suma importancia pa tin comprondemento di dje. E disputa, drama of mihor bisa guera cu tin entre Minister Oduber y e periodista Speed ta un acontesimento asina cu mester un tiki splicacion pa su comprencion. Specialmente pasobra cu hasta Parlamento mester a reuni den pura riba diamars merdia den un ‘vragenuur’ cu e meta pa calma e guera entre Minister Oduber y Speed.

Minister President ta e autor
Tras di tur e guera aki nos ta haya nos Minister Presidente Eman kende no a keda nada contento cu e carta di retiro cu Minister Oduber entrega na Gobernador y tur e drama cu sigi tras di e entrega aki. Esaki a trece cune cu Speed cu ta conoci di ta serca di Minister Eman a haci uso di e oportunidad pa haci algun pregunta skerpi na Minister Oduber.

Practica di Friends & Family
E preguntanan di Speed a duna Pueblo un bista di e practicanan cu ta wordo haci pa asina por saca probecho di fondo publico di nos Pais. E preguntanan a mustra con Minister Oduber ta practica ‘friends & family’ cu ta algo cu den opocicion e tempo ey Parlamentario Otmar Oduber a cuestiona fuertemente. Pero awe, door di Speed su preguntanan skerpi y e contestanan di Minister Oduber ta sali na cla cu e mandatario mes lo ta ‘deep deep’ den e practica di ‘friends & family.’

Reacion inespera di sostenedornan
Tur e dianan tras di lomba a sigi un sin fin di tiramento di palabra y hasta menasa pa bay corte entre e mandatario y e periodista. E sostendornan tambe a duna nan opinion. Pero locual cu a tuma Minister Eman di sorpresa ta cu e sostenedornan di e Minister a sali y conta publicamente kiko ta pasa den e kring di Minister Eman. Spanta pa e reacion inespera aki, Minister Eman a cuminsa cu ‘damage control’ pa pone un stop na e guera cu e mes a start.

A yama ‘vragenuur’ pa calma e guera
Ta bisto cu pa calma e guera Minister Oduber mester a hala aden e caso contra e periodista, Speed mester a baha man na cuestiona e mandatario y Baba cu Dammers mester a percura pa yama un reunion di 'vragenuur' den Parlamento cu e meta pa calma e guera door di laga Minister Oduber gaña trece transparencia den e asuntonan cu a wordo cuestiona pa Speed den e conferencia di prensa. Pero enves cu e Minister a contesta tur pregunta, e mandatario a keda sin contesta esun mas importante, pa Pueblo por haya sa cuanto e compania di su amigo ta strika for di e budget di mercadeo di ATA. Asina Minister Otmar a laga caminda habri atrobe pa Speed y tur otro keda cuestione.

Contract y proyecto ta cura tur herida
Minister Eman no a logra stop e guera cu un ‘vragenuur.’ Pesey nos ta premira cu Minister Eman lo percura awor sea pa un contracto pa e periodista suficientemente interesante of un proyecto pa e Minister por briya cune. Pasobra contract y proyecto ta cura tur herida. A buen entendedor, pocas palabras.

6 april 2016

Expresionnan haci den e articulo aki no necesariamente ta refleha opinion di ArenaPoliti.co