Oranjestad: "Nos a tuma nota atravez di medionan di prensa cu un bes mas un comerciante a bira victima di atraco den su cas. Ni 1 luna pasa, tabata nos Reina di Carnaval 2016 cu tambe a bira victima di un acto similar.

Durante 2015 tabata tin diferente incidente di indole menciona. Ta p'esey awendia comerciantenan mester ta mas cauteloso cu nunca. Y no solamenta den nan negoshi, sino hasta na nan hogar! Ta pa es motibo aki mi a yega di elabora entre otro riba e systema di "Panick Button" (Boton di Panico).
Ta trata di un systema - un alternativa - hopi usa den varios Pais na mundo, cu no solamente a duna resultadonan masha positivo pa cu e combatimento y prevencion di criminalidad, pero cu tambe a contribui enormemente na restablece e sentimento di seguridad den comunidad. E sistema ta traha door di manda un señal directo na central di alarma na momento di primi e boton cual ta resulta den un asistencia di inmediato y na e punto caminda e aparato a wordo acciona. Ademas di un aparato, e systema por funciona via un smartphone pa medio di download un aplicacion.
"Boton di Panico" no ta util solamente pa e comerciante, sino tambe pa nos hendenan grandi y tur den nos comunidad cu por ta un target pa motibo di nan posicion laboral if social. E ta un systema di alarma cu den combiancion cu por ehempel 911 por hasta yuda na salba bida di nos grandinan na momento cu nan bira malo, por ehempel un ataca di curason y no tin ayudo serca.
E realidad  den pleno 2016 ta, cu e sentimento di inseguridad ta dominando nos Pais y nada drastico a sosode pa trece un cambio y esaki ta di lamenta pasobra Pueblo di merece mihor di loke ta pasando. Nos di Partido no ta contento cu e situacion y no kier para keto na solo crítica. Mas bien ta e momento indica pa propone alternativanan tangibel pa combati pero vooral preveni criminalidad. Partido MEP kier debolbe nos comunidad e sentimento di paz y trankilidad cu semper tabata custumbra tini. Na final Solo mester sali bek pa nos Tur!

Expresionnan haci den e articulo aki no necesariamente ta refleha opinion di ArenaPoliti.co