E resultado di eleccion na Corsou sigur ta mustra uno hopi interesante pa analisa y saca conclusion pa loke ta desaroyo politico den estadonan chikito y cu ta conta tambe pa nos pais. Ya caba pa algun luna UPP a bin ta sigui e desaroyo na Corsou, na unda cu nos por a mira un “schoon schip” cu partido MAN a cuminsa cu ne y cu awe por mira e resultado. Un recuperacion tremendo, no unicamente basa riba e cambionan na nivel di partido, sino tambe pa e mensahe cu partido MAN hunto cu su lider Hensley Koeiman a trece, esta di inclusion, unda tur hende ta conta, confianza den den gobernacion y bon gobernacion. Puntonan cu UPP pa varios aña caba a bin ta presentando, pero cu aki na Aruba parce cu no tin espacion pa nos papia riba esaki, ya cu cada uno ta prefera di hiba su mesun proceso.
Particularmente e pensamento di un gobernacion drechi, ta caminda cu pueblo di Corsou a ripara cu ta e unico caminda pa salbacion, esta reglanan di bon gobernacion y marando man di e politiconan. Esaki ta punto cu nos di UPP tambe ta purba cada vez di inculca den nos pueblo. Cu e resultado na Corsou, parce cu e pueblo di a cuminsa realisa cu esaki ta e caminda. No unicamente e victoria di MAN, sino tambe e resultado di PAR, cu a sabi di mantene su asientonan, y PNP cu a bay dilanti. Pues parce di tin un speranza y cu no por keda biba di promesa mas of fabornan.

Esaki tambe UPP ta kere cu mester wordo realisa aki na Aruba. Nos mester stop cu e bla bla di bon gobernacion, bin cu ley di financiamento politico, reglanan di bon gobernacion, ombudsman etc., sino pone accion tras di e palabranan bunita ey. Keto bay, despues di 7 aña di gobernacion no por a bin cu e ley di financiamento. Nos por mira parlamentarionan, tanto di esnan cu ta sostene gobierno,c omo di oposicion ta swaai cu e ley cu tabata cla caba di di 2007, pero no tin e guts pa pasa esaki.
Mesun caso nos por a ripara recientemente, e siman aki ainda. Ora gobierno yena un vacatura sin ningun clase di “open solicitatie”, nos ta mira oposicion ta core grita cu esey no ta transparente, ni ta un muestra di bon gobernacion. Pero awor nos por mira, cu nombracion di un director di un compania nacional recien lanta, ta bay sin un solicitud habri. Enbes di cuestiona por lo menos e proceso di e nombracion aki, partidonan tradicional ta sali afor y felecita e persona y pueblo cu e nombracion aki. UPP sigur no tin duda den capacidad di e persona en cuestion, pero no pasobra e ta un persona yega na un cadidato riba un partido, ta acepta un nombracion asina sin mas y apoya esaki.  Apoyando esaki sin mas, ta kita tambe bo credibilidad pa cuestiona posibel otro nombracionnan.  Apoyando esaki sin mas, ta mustra cu como partido tradicional bo por papia kico bo kier, pero cu como partido den gobierno bo lo por haci mesun cos. Parce cu den politica ta predica algo, pero den practica ta haci otro. Esaki sigur mester ta un aspecto di bon gobernacion, cu lo tabata na su lugar pa tabata tin un procedura habri.

Pues UPP ta spera cu e pueblo di Aruba por siña di e resultado di eleccion na Corsou y cu e concepto di Good Governance, ta e caminda cu nos mester tuma tambe pa saca e pais aki padilanti. Sacando e pais padilanti, di mes lo por hiba na e progreso y felicidad cu cada ciudadano merece. Un progreso na unda cu un y tur por beneficia di dje y asina garantisa un mihor futuro pa nos yiunan. Un futuro di “no nonse” y “luchtkastelen”, sino un futuro unda henter Aruba ta parti di adelanto y progreso, cuminsando cu Bon Gobernacion.


Lider di UPP
C.A.S.D. Wever
9 di oktober 2016

Expresionnan haci den e articulo aki no necesariamente ta refleha opinion di ArenaPoliti.co