AVP ta gusta broma cu nan ideanan semper ta nobo, creativo of profesional/cientifico. Claramente bo ta nota cu nan ta haya ayudo di companianan profesional den mercadeo (haci propaganda), specialmente di Merca. Pues nan politica no tin nada nobo, creativo of algo innovativo. Nan politica tin e meta principal pa ‘belazer’ pueblo, uzando e mesun tacticanan di mercadeo cu ta wordo uza pa haci un hende adicto na alcohol y tabaco. Pues cu otro palabra nan ta sigui practica politica tradicional, coriendo campaña miyonario (cu placa di pueblo y di e finder’s fee) cu un saus ‘innovativo’ di engaño. Lastimamente un parti di nos pueblo cada bes ta cay den e mesun trampa bieu y ta entrega su voto en cambio di tur sorto di regalo of fabor.

Nan ta gaba cu proyectonan grandi y awendia hasta biyonario! Loke AVP ta haciendo, no ta nada dificil, ni ta rekeri ningun estudio profundo. Tur partido politico, y te hasta un ciudadano cu un crenchi di educacion, por haci loke AVP ta haciendo cu Aruba. TA FACIL PA BO EMBEYECE BO CAS CU PLACA DI OTRO HENDE!

AVP ta ‘embeyece’ Aruba mediante proyectonan biyonario y cuestionabel, pa horca e pueblo y su descendientenan (yiunan y nietonan) cu debenan astronomico. Nan ta haci uzo di e ‘finder’s fee’, pa financia nan campañanan miyonario di susha wowo di pueblo, sigui cumpra voto (algo ilegal y contra ley) pa asina mantene e poder y keda den gobierno.  Loke e gobierno ta haciendo ta ‘DORNA ARUBA CU DEBE Y ENTREGA ARUBA SU PATRIMONIO Y SU HENDE NA OTRO NACIONALIDADNAN. Algun ehempel, e ponemento di algun KLINKER atrobe na cierto sitionan strategico pa nan. E proyecto miyonario fracasa di TRAM. E ‘estafa’ biyonario di e CAMINDA SCUR.  Y desde 27 september, cu ayudo di tur fraccion den parlamento e ‘APERTURA DI E MEHORADOR CITGO’. Cu e ultimo ehempel aki, gobierno a redobla e debe nacional di 4 biyon pa entre 8-9 biyon florin. Pues e MEGA DEBE di cual oposicion tabata keha 7 aña largo di dje, a wordo redobla den apenas algun ora, cu su SOSTEN.

E partidonan tradicional a daña nos sistema democratico y corumpi e mente di hopi votado. Nan a crea e percepcion cerca e votadonan cu ta proyectonan y placa ta dicidi resultado di eleccion. Husto pa caba cu e engaño, e sclavisacion mental y e entreguismo perpetuo di pueblo, partido ABO a wordo lanta. Partido ABO ta contra e idea di core campañanan miyonario y cumpra voto, pa solamente haci e pueblo mas catibo di e clase politico y su grupito privilegia. Partido ABO ta respeta e integridad di tur ciudadano y ta haci un apelacion riba nan mente independiente y nan escogencia propio, basa riba nan conviccion y nan boluntad liber. Partido ABO ta contra sclavitud den tur forma.

Nos pueblo mester mantene su dignidad y su orguyo di ta sernan humano cu ta pensa y dicidi pa su mes den pleno libertad. Cada dia partido ABO ta demostra cu bo no mester bin di un cierto famia of cu bo no mester di ta un miyonario pa conscientisa pueblo, duna bo opinion of participa na e proceso democratico. Partido ABO ta mustrando cu democracia ta di nos tur y cu cada ciudadano su opinion mester wordo respeta. P’esey nos ta pidi pueblo pa tuma nota di nos publicacionnan mediante pamfletanan, comunicadonan, discursonan na radio y via www.aboaruba.org. Pasobra nos a constata e cuater poder democratico awendia no ta funciona manera mester ta aki na Aruba. Un parti di dje tambe a wordo cumpra y corumpi pa e politico tradicional. Nos no tin un prensa liber y independiente mas aki na Aruba. Tin algun medionan di prensa activamente ta keda sin publica (of simannan despues) nos comunicadonan, siendo cu nos tambe ta un partido politico legitimo. Pues un otro ehempel con activamente opinionnan diferente cu esun di gobierno, ta wordo filtra pa no yega pueblo. Un censura di informacion, pa laga pueblo kere cu tur cos locual gobierno ta bisa ta ‘E BERDAD’.  

E cuestion di cu si bo no tin miyones, bo no por gana un eleccion, tambe ta un engaño y mito. Ningun di nos dos estadista mas grandi, tabata miyonario y tampoco a hiba campañanan miyonario. Pero awendia e politico tradicional ta spat miyones, sin cu un parti di pueblo ta puntra di unda e ta saca e miyones pa hiba su campaña miyonario. Na 2013, un politica hoben parlamentario a disparce for di e panorama politico ora a sali na cla con su campaña tabata wordo financia. E caso parce a termina den un otro ‘doofpot’, pero keto bay tin campañanan miyonario ta wordo organisa sin cu nan ta wordo investiga. Si e partidonan tradicional por a pone tur diferencia politico un banda pa pasa e ley pa drecha nan posicion huridico den 6 minuut, ‘E Amienda’ y pa REDOBLA e MEGA DEBE den algun ora, anto dicon nan no kier introduci e ley di financiamento di partidonan politico? Kico nan tin algo di sconde?

Ta e pueblo humilde tin e poder democratico y no e clase politico tradicional y su grupito privilegia. Basta di REDOBLA e MEGA DEBE cu proyectonan anti-pueblo. Basta di bende y entrega Aruba na otro nacionalidadnan. Y basta di kere cu e clase politico tradicional y su grupito privilegia, ta mas cu bo persona. Nos tur ta igual y ningun politico por bira miyonario riba lomba di pueblo. Bo persona no a duna e politico tradicional bo sosten pa limita democracia na 1 dia den 4 aña. Bo persona tampoco a duna e politico tradicional bo sosten pa bende y entrega Aruba na tur otro nacionalidad. Pues realisa cu DECORA y DORNA Aruba cu hopi debe y yam’e progreso, vision y salbacion, ta simplemente manipulacion y entreguismo!


(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co