IMF ta entrega e siman aki su evaluacion preliminario      

ORANJESTAD - E siman aki IMF ta concluyendo un bishita di dos siman na Aruba. A base di articulo 4 di e statutonan di IMF, di cual Reino Hulandes ta parti di dje, cada dos aña nan ta bin haci un evaluacion na Aruba riba tereno socio economico, fiscal y financiero. E ultimo evaluacion tabata na 2015 y awor IMF ta un bes mas aki na Aruba. Nan a papia cu Minister Arends, kende a splica cu un bes mas IMF tabatin un agenda basta druk, bishitando diferente instancia gubernamental, semi-gubernamental y tambe institutonan manera Banco Central, Raad van Advies y partidonan politico cu ta representa den Parlamento di Aruba y miembronan independiente. "Asina nan ta haya un bista kico ta tumando luga na Aruba y con e sociedad ta hinca den otro. Nan a bishita diferente proyecto mescos tambe e refineria". Minister Arends a enfatisa cu importante ta cu IMF a mira tambe e fruto di inversionnan cu a inicia na 2010.

"Nan ta hopi satisfecho cu e informacion cu nan a haya y awor nos mester warda te ora IMF duna e resultado preliminario di e investigacionnan". Arends a splica cu IMF ta un instituto totalmente independiente. Hopi biaha e companianan di rating (p.e. S&P y Fitch Ratings) ta usa e mesun analistanan pa bin Aruba of cu ta ocupa nan mes cu e cartera di Aruba. E analistanan aki ta bin tur aña y semper ta keda dos of tres dia. "Asina ta cu despues di un par di aña nan tin un idea hopi cla con maneho di gobierno ta hinca den otro. IMF ta bin cada dos aña y semper cu un ekipo completamente nobo. Ta pesey nan ta keda mas largo y ta tuma nan tempo pa compronde tur loke ta tuma luga, tanto den gobierno como den instancianan pafo di gobierno. Nan trabou ta rekeri hopi cautela y tambe hopi dedicacion di parti di esnan cu ta wordo entrevista", Arends a bisa.

Minister di Asuntonan Economico a informa tambe cu esaki ta prome biaha desde Aruba ta forma parti di articulo 4 di statutonan di IMF cu Aruba ta cay bou region di Caribe. "Ora di haci comparacionnan nos por wordo compara cu pais y islanan den region. Prome cu esey, te cu 2015, nos tabata cay bou Europa cu tabata haci e trabou di e analistanan un poco mas complica pa por saca conclusionnan."

"Nos ta habri y ta aplaudi bishitanan di IMF, pasobra manera nos a bisa nan tambe: "Nos kier haci algo cu nan consehonan ya cu nan ta consehonan cu ta tene cuenta cu varios aspecto cu gobierno di Aruba tambe a tuma. Di un banda e parti socio economico y otro banda e parti financiero, semper purbando di yega na un balance pa tuma e pasonan necesario pa reforma cu ta necesario pa wordo tuma sin causa un desbalance socio economico ni laboral."

Expresionnan haci den e articulo aki no necesariamente ta refleha opinion di ArenaPoliti.co