Awor cu e inversionnan grandi y chikito cu AVP a haci den nos pais ta biniendo cla, ta tempo pa nos pais cosecha e frutanan di esaki. Den e maneho economico di AVP pa e añanan cu ta bin, por lesa kico e meta di AVP ta y con ta bay realisa esaki.

AVP a rechasa e maneho di austeridad cu Hulanda a propone y cu MEP ta na fabor didje. AVP a scohe pa sigui un strategia basa riba crecemento. Dor di haci esaki AVP exitosamente a saca Aruba for di un caida enorme den economia di 13% na 2008 y hiba Aruba na un crecemento economico di 3.4% na 2017. Cu e inversionnan haci, cu e refineria bek den operacion, turismo ta crece atrobe y sectornan economico den funcion, e crecemento lo ta continuo riba termino medio. De facto ta asina cu, cu un turismo stabil y e refineria habri so caba, e crecemento economico ta bay ta stabil pa e añanan benidero.

Efectonan di diversificacion di nos actividadnan economico y e spin-off di rehabilitacion intensivo di labor no ta inclui den e prognostico aki. Entre 2010 y 2017 desempleo a baha di 12% pa 7.5% y ta proyecta pa baha te 5% riba termino medio asina cu e refineria bira operacional.

E poder di compra di famianan cu entrada di AWG 2.500 of menos a subi cu 11% durante e ultimo 8 añanan. Tur cos cu nos haci awor pa aumenta actividadnan economico, ta sigui contribui na prosperidad y na mehora calidad di bida di nos tur aki na Aruba. E ta prosperidad cu ta bay traduci su mes den bienestar pa tur.

Vision di AVP ta pa famianan por sigui padilanti: pa nan no tin e ansha di pensa con paga tur nan gastonan di cas, pa nan por percura pa nan mayornan di edad y brinda un miho futuro pa nan yiunan. Pa por realisa esaki, ta necesario pa e economia di Aruba sigui crece riba un curso sostenibel. Esey ta e meta di e maneho economico di AVP. E crecemento continuo di e añanan cu ta bin lo percura pa mas cupo di trabou, mas y miho entrada pa trahadornan y nan famia. E rol di gobierno lo ta pa percura pa e progreso aki, bira bienestar pa tur hende. E maneho y resultadonan economico lo wordo traduci den bienestar cu tur hende lo mester sinti.

Expresionnan haci den e articulo aki no necesariamente ta refleha opinion di ArenaPoliti.co