Relaciona cu celebracion di Dia di Obrero

Dia promer di Mei ta un dia hopi special pa tur trahador rond mundo y na Aruba en especial. Riba e dia aki nos ta recorda e lucha di e trahadornan pa haya reconocemento pa tur locual nan ta haci pa bienestar di nan mes, nan famia y nan comunidad. Como un partido cu e ideologia social democrata semper MEP ta sali na vanguardia di e clase trahador y asina ta duna contenido real na e ideologia aki.

Leynan laboral
Den pasado MEP a demostra esaki door di introduci varios ley laboral y realisa un gran cantidad di benificio salarial y secundario pa e clase trahador, manera entre otro e ley di pago igual pa trabao igual, e ley encuanto contrato individual pa trabao di corto duracion, e separacion di impuesto pa parehanan casa, e status igual pa werksters/arbeiders y placa pa nan yiu(nan) y gastonan medico paga, subsidio pa tur gasto di personal pa fundacion y centronan di bario. MEP no ta kere den incidentalmente duna e trahadornan un miserabel toeslag y despues kita esaki atrobe for di nan. Ta pesey durante tur gobernacion di MEP e sueldo minimo a wordo aumenta den forma structural y substancialmente. Durante 2001-2009 esaki a ser aumenta na 7 ocasion!

Mas placa den cartera
Trahadornan na Aruba bao di gobierno di MEP a conoce reduccion substancial di nan inkomstenbelasting y tambe deduccion di gastonan relaciona cu trabao. Entradanan di interes riba cuentanan di spaar a wordo completamente exonera di Inkomstenbelasting. E suma na kinderaftrek a wordo aumenta drasticamente y gobierno di MEP semper a aplica pa tur trahador e ‘inflatie correctie’. E suma cu no ta paga belasting riba dje a wordo amplia na varios ocasion. Empleadonan publico a haya aumento di Gelijk Bedrag, Bashi premie y Prima di vacacion cu ta igual na un salario extra y tambe nan a haya aumento den nan salario y esaki pa compensa e aumento di costo di bida. Mamanan embarasa a haya verlof  di trabao 6 siman promer y 6 siman despues cu nan duna luz y alavez nan ta haya oportunidad pa cria nan baby cu lechi di pecho durante oranan di trabao.

MEP ta hopi preocupa si cu e poder di compra di e clase trahado ta sigui bay atras debi na tur e medidanan cruel cu ultimamente Gabinete Eman ta implementando riba henter pueblo y cu esaki ta conduci na menos placa den cartera di nos trahadornan.

Compromisonan di MEP
Desde ciere di refineria Valero na november 2012 nos economia a stagna, varios negoshi a cera y miles di mama y tata di famia ta sin trabao. Segun ultimo cifranan publica e desempleo ta riba 10%, sinembargo nos sondeonan ta mustra cu tin un cantidad grandi di desempleo scondi.  Desempleo ta halto tambe bao di nos hobennan. MEP ta kere cu e base pa un recuperacion di nos pais  ta sinta den mehoracion di e economia na forma sostenibel y productivo y creando mas cupo di trabao pa esnan cu ta desemplea actualmente. E inversionnan haci te cu awor door di e gobierno actual tabata den infrastructura di nos pais y no tabata productivo ni sostenibel. Cu nos economia no ta mustra un crecemento real ta debi na factornan internacional, sinembargo tin varios factor cu nos mes por controla. MEP ta di opinion cu nos mester fortifica nos base economico awor, pero tambe diversifica nos economia, y na mes momento crea cuponan di trabao.

Reapertura di refineria
E prioridad cu MEP ta mira na e momento aki ta cu gobierno mester haci lo maximo esfuerso pa habri e refineria atrobe, ya cu esaki lo genera cuponan di trabao bon paga, duradero y di inmediato crece nos economia cu 12%.  Alavez MEP tin varios otro plan realistico pa crea mas pilar economico y stimula mas empresa y fabrica local, cu  lo crea miles di cupo di trabao den diferente area, manera recreacion pa turismo, agricultura, cria y pesca, comercio di servicio, industrianan chikito y mediano di productonan pa e mercado local, industria y cultura. Tur esaki ta solamente realisabel na momento cu pueblo bolbe duna MEP e oportunidad pa goberna y asina salvaguardia nos economia y finanzas publico.

Riba e dia awe partido MEP ta felicita tur trahador den tur sector y ta manda su mas sincero deseo pa nan continua cu nan trabounan valioso na bienestar y progreso di Aruba.

Cu Dios Todopoderoso drama su bendicion riba tur trahador y nan famia y cu nan lo pasa un feliz Dia di Obrero.

Expresionnan haci den e articulo aki no necesariamente ta refleha opinion di ArenaPoliti.co